Shtab músheleri «Taraz KojObýv» JShS-nyń bylǵary óndirisi men aıaqkıim sehtarynyń jumysymen tanysyp, kásiporynnyń eńbek ujymymen kezdesti. Seriktestik – bylǵarydan jasalǵan buıymdar men aıaqkıim shyǵaratyn iri óndirýshi jáne teri óńdeýden bastap, daıyn ónim shyǵarýǵa deıingi tolyq óndiristik sıkli bar jalǵyz otandyq kásiporyn. Eki óndiriste de 500-den asa qyzmetker jumys isteıdi. Kompanııanyń basshysy Baýyrjan Naızaqulovty «Aq jol» partııasy Taraz qalasy máslıhaty depýtattyǵyna kandıdat retinde usyndy.
– Birneshe jyl buryn osynda kelgende, kásiporyn negizinen Semeıden shıkizat satyp alatyn, biraq keıin Semeıdegi zaýyt bankrotqa ushyrady. Sondyqtan kásipker bylǵary óndirisin ózi quryp, daıyn ónim shyǵarý úshin terilerdi aýyldaǵy sharýashylyqtardan satyp alýǵa májbúr boldy. Mundaı kásipkerlerdi qorǵap, qoldaý qajet. Sonymen qatar kıim-keshek pen aıaqkıim ınflıasııaǵa jáne halyqtyń ál-aýqatyna tikeleı áser etetin taýarlar, – dedi Azat Perýashev.
Jıyn barysynda zaýyt basshylyǵy birqatar túıtkildi máselege toqtaldy. Mysaly, eskirgen tehnıka, óndiris iske qosylǵanǵa deıin shegerimi bar ınvestısııalyq nesıelendirýdiń joqtyǵy, fermerler men aýyl turǵyndarynan teri satyp alýǵa beriletin sýbsıdııanyń toqtap qalýy sııaqty problemalar kóterildi. Kadr máselesi de ózekti bolyp tur.
Jumysshylar nesıe ósimi, baǵa turaqsyzdyǵy, baspananyń qoljetimsizdigi týraly oılaryn aıtty. A.Perýashev kásiporyn men eńbek ujymyn qoldaıtynyn aıtyp, parlamentte «Aq jol» fraksııasy qurylǵannan keıin bul máselelerdi Úkimet aldynda kóterýge daıyn ekenin málimdedi.
Shtab músheleri Taraz qalasynyń turǵyndarymen de kezdesti. Partııanyń saıası baǵdarlamasy tanystyrylǵannan keıin erkin pikiralmasý órbip, partııa tóraǵasy jınalǵan qaýymnyń suraqtaryna jaýap berdi.
