Kezdesýdiń shymyldyǵyn Akademııa rektory Erlan Ábil ashyp, is-shara qonaqtary men qatysýshylaryna alǵys aıtty.
Jıyn barysynda Astana qalasy Qoǵamdyq keńesiniń múshesi, QHA keńesi múshesi, Qazaqstan Respýblıkasyndaǵy «Vaınah» sheshen jáne ıngýshtar qaýymdastyǵynyń teń tóraǵasy Iýsýp Hasanovıch Kelıgov tarıhqa tereńinen úńilip, qazaq halqyna degen rızashylyǵyn bildirdi.
«Barshańyzdy Alǵys aıtý kúnimen quttyqtaımyn. 1930 jyldary ashtyqtyń saldarynan jarty halqynan aıyrylǵanyna qaramastan, Qazaqstanǵa aıdalǵan ózge ult ókilderin baýyryna basqan qazaq halqynyń ereksheligin atap ótkim keledi. Biz – deportasııalanǵan halyqtyń urpaǵymyz, balalarymyzǵa qazaq halqynyń toleranttylyǵy men meıirimdiliginiń arqasynda aman qalǵanymyzdy únemi aıtyp otyramyz. Olar búgingi turaqtylyq pen beıbitshiliktiń qadirin túsinsin degen oımen tarıhty urpaqtan urpaqqa jetkizip kelemiz. Búgin – Qazaqstanda turatyn 130-dan astam ult ókiliniń alǵys aıtatyn kúni. Elimizdiń damýy jolyndaǵy barlyq kezeńniń kýágeri bolyp jatqanymyzǵa qýanyshtymyz», dedi Iýsýp Hasanovıch.
