Jýyqta Tótenshe jaǵdaılar departamentiniń qyzmetkerleri taýly jerde qalyp qoısańyz, qalaı aman qalý kerektigin úıretti. Aldyn ala jazylǵan baǵdarlama boıynsha Rıdder qalasynyń mańyndaǵy taý shańǵy bazasynda qar kóshkini túsip, týrısterdiń biri qar qursaýynda qamalyp qalǵan. Kúntizbede kóktem shyqqanymen, taýly jerdiń qary siresken kúıi jatyr. Aıaz qysyp barady. Taý basynda jatqan qardyń kóbesi sáýir bolmaı, sógile qoımaıdy. Sondyqtan da qutqarýshylar jetkenshe úsip qalmaýdyń amalyn qarastyrǵan jón.
Taýly jerde aman qalý úshin adamǵa eń qajeti – sý, tamaq, qalqalaý jer jáne sirińke. Qutqarýshylardyń keńesine qulaq túrsek, eń aldymen, jeldiń ótinen alystaý jerge jetip, qos ispetti qalqa jasap alǵan abzal. Qardy qazyp, betine aǵash búrlerimen qymtasa, tipti durys. Astyńǵy jaǵynan janǵan ottyń jylýy tysqa taramaıtyndaı bolsa, úsip qalmasyń anyq. Aıtqandaı, jazdygúni ot jaǵý ońaı shyǵar, al ylǵaldy boıyna sińirgen aǵash tez tutana qoıar ma eken. Demek qar baspaǵan kepken qaraǵaı búrlerin jınap, tutatyp kórý kerek. Jalyndap jana bastaǵan soń ǵana ylǵal tartqan kesek aǵashty tastaý kerek. Eger janqaltańyzda ot jaǵýǵa arnalǵan suıyqtyq bolsa, sý tartqan aǵashtyń ózin tutatyp jiberýge bolady. Mine, qar qursaýynda qalsańyz, ne isteý kerektigin qutqarýshylar is júzinde kórsetti.
Jalpy, dalaly jerge shyǵyp bara jatqan týrıst sómkesine ottyqtan bólek, pyshaq, kompas, jyly kıim, dári-dármek, qol sham, sý alyp júrgeni durys. Bul qutqarýshylardyń da aqyl-keńesi. Al oqys jaǵdaıǵa tap bolǵan týrıst birden 112 nómirine habarlaǵany durys.
Dál qazirgi ýaqytta shyǵysta kóshkin júrý qaýpi óte joǵary. Eń durysy, taý-tasqa shyǵýdy keıinge qaldyra turǵan jón.
Shyǵys Qazaqstan oblysy
