Jas jyrshylar jarqyly

Bul jyr saıysy osymen ekinshi ret ótkizilip otyr. 2021 jyly Aqtóbede «Er Edige» jyr mektebi ashylyp, sol jyly alǵash ret «Edige degen er eken»  respýblıkalyq jyrshylar baıqaýy ótkizilip, О́ner ortalyǵy sahnasynda «Qyrymnyń qyryq batyry», «Edige» jyrynyń el jadyndaǵy nusqalary shyrqalǵan bolatyn.

Eki jyldyń ishinde Aqtóbedegi «Er Edige» mektebi shákirtteriniń sany 40-tan asty. Halyq dastandaryn jany súıetin mektep oqýshylary men joǵary oqý ornynyń stýdentteri dáris alatyn mektepke jyraý Ádilbek Sarın jetekshilik etedi. Júıeli ju­mystyń nátıjesi bolar, osy jyr mektebiniń shákirtteri respýblıka­lyq, oblystyq baıqaýlarda úzdik shy­ǵyp júr. Sonymen birge Aqtóbe qalasynyń tórt mektebinde Ádilbek Sarınniń basshylyǵymen jyraýlyq ónerge baýlıtyn tórt úıirme ashyldy.

Bul joly «Qobylandy degen eri bar...»  baıqaýynyń bas júldesi  Ba­tys Qazaqstan oblysynyń týmasy, Qurmanǵazy atyndaǵy Qazaq ulttyq konservatorııasynyń 4-kýrs stýdenti Albına Sabyrovaǵa buıyr­dy. Saıys­tyń qazylar múshesi bıyl­dan bastap «Jyl jyrshysy – 2023» ataǵyn bekitip, ony bir­neshe dastandy jatqa biletin ári úzdik oryn­daıtyn jas jyrshyǵa tabystaı­tyn bolyp kelisti. Bıyl osy ataqqa «Er Edige» jyr mektebiniń shákirti Samal Medeýbaeva laıyq dep tanyldy. Samal Aqtóbedegi A.Jubanov atyndaǵy mýzykalyq kolledjdiń 4-kýrs stýdenti, onnan astam kólemdi dastandy jatqa aıtatyn qabiletti jas. Osy baıqaýda Pavlodar oblysynan kelgen Jiger Bókenniń jyrdy qobyzda oryndaý sheberligine tánti bolǵan «Er Edige» jyr mektebiniń jetekshisi Ádilbek Sarın oǵan óz atynan at mingizdi. Jiger Pav­lodardaǵy «Shańyraq» mádenı orta­lyǵynda jumys isteıdi. Daýys dıa­pazony óte joǵary ári jyrdy qobyzda jyrlaıtyn talantty jyrshy Qobylandy jyryn emes, óz qa­laýymen basqa jyrdy oryndaǵa­ny úshin júldeden qaǵyldy. Qazy­lar alqasy birinshi oryndy Symbat Jomartova, ekinshi orynǵa Jambyl oblysynan kelgen Bekarys Kóshtaev­qa berdi. Bekarys Qazaq Ulttyq О́ner ýnıversıtetiniń Dástúrli mýzyka­lyq óner fakýltetinde dástúrli jyr mamandyǵy boıynsha dáris alyp júr. Ol Qobylandy batyr jyrynyń Marabaı jyraý nusqasyn jyrlap qana qoımaı, Jambyldyń tolǵaý­laryn da tamasha oryndap, kórer­men yqy­lasyna bólendi. Sondaı-aq Aqtóbe oblysy ákiminiń júldesi «Er Edige» jyr mektebiniń shákirti Ǵanı Qaı­rollaevqa, «Qobylandy batyr» atyn­daǵy júlde Astana qalasynan kelgen Abdýrrahman Estaıulyna buıyrdy. «Jas jyrshy» nomınasııasyn «Er Edige» jyr mektebiniń shákirti Jan­erke Quttyǵaı aldy.

Aıta ketý kerek, osy saıysqa qaty­sý­shylardyń jas ereksheligi 17 jas pen 40 jas arasynda bolyp belgilengen. Baıqaýǵa qatysýshylardyń arasynda jyrshy jigitterge qaraǵanda, jyrshy qyzdardyń sany kóbirek eken. Sondaı-aq Aqtóbedegi «Er Edige» jyr mektebinde dáris alýǵa qyz balalar kóbirek yqylas tanytady eken. Bul óz kezeginde jyr ónerine er balalardy kóbirek baýlý qajettigin kórsetedi. Mektep muǵalimderi osy  máselede jaqsylap oılanýǵa tıis.

Aqtóbe oblystyq mádenıet bas­qar­masy Muhtar Áýezov atyndaǵy Ádebıet jáne óner ınstıtýty mamandarymen birlese Qobylandy batyr jyrynyń ǵylymǵa belgili 29 nusqasyn birge jınaqtap shyǵarý­dy qolǵa alyp jatyr. «Er Edige» jyr mektebiniń oryndaýyndaǵy «Qobylandy batyr» jyrynyń Nur­peıis Baıǵanın jáne Marabaı nus­qalary sıfrlyq formatta jáne kitap túrinde shyǵarylmaq.

Aqtóbe oblysy