Spıkerdiń aıtýynsha, Astananyń eńbek naryǵyndaǵy jaǵdaı turaqty jáne erekshe baqylaýda. Kásipkerlikti damytý jónindegi ulttyq jobany iske asyrý aıasynda ótken jyly 27,5 myńnan asa jumyssyz adam áleýmettik qorǵaý sharalarymen qamtyldy. Olardyń arasynda 12,4 myń adam jańa jumysqa turdy, al onyń ishinde elordanyń 8 362 turǵyny turaqty jumys oryndaryna ornalastyryldy.
Sonymen qatar jańa bıznes-ıdeıalardy iske asyrýǵa arnalǵan 350 grant berildi. Jumys berýshilerdiń suranysy boıynsha kásiptik oqytýdan 172 adam ótti, jumys berýshiniń jumys ornynda kásiptik oqytýdan 64 adam ótti. Buǵan qosa «Bastaý bıznes» jobasy boıynsha 4 320 adam, al enbek.kz platformasynda 598 adam onlaın oqydy.
«Astanada 40 513 jańa jumys orny quryldy. Onyń ishinde 35 981-i – turaqty jumys orny. Jumyssyz azamattar men jumyspen qamtylmaǵan halyqty jumysqa ornalastyrý múmkindikterin keńeıtý maqsatynda 62 bos jumys oryndar jármeńkesi ótkizildi. Sondaı-aq 2022 jyldan bastap «Jastar praktıkasy», «Alǵashqy jumys orny» jáne «Urpaqtar kelisimsharty» jobalaryna qatysýshylardyń jalaqysynyń mólsheri 30 AEK-ke deıin artty. Jastar men halyqtyń áleýmettik osal toptary úshin jańa bıznes-ıdeıalardy iske asyrýǵa arnalǵan grant mólsheri 400 AEK-ke deıin (1,2 mln teńgege deıin) ulǵaıtyldy», dedi S.Jamanbaev.
Sonymen qatar 2023 jyly elordanyń 24 myńnan asa turǵynyn, onyń ishinde jastar arasynan 16,5 myńnan asa adamdy jumyspen qamtý sharalaryna tartý arqyly eńbekke aralasýyna jaǵdaı jasaý josparlanyp otyr. Bul rette 55 myńnan asa jańa jumys oryndaryn qurý kózdelip otyr. Onyń ishinde 10,3 myń oryn Ulttyq jobalar aıasynda júzege asyrylmaq.
«Elektrondyq eńbek bırjasy portalynda 1 674 jumys berýshi 4 306 bos oryn ornalastyrdy. Sondaı-aq bıyl beıindi basqarma jastarǵa 5 jylǵa deıingi merzimge jyldyq 2,5%-ben 5 mln teńgege deıingi mólsherde shaǵyn nesıe berýdiń jańa tetigin engizýdi josparlap otyr. Elordada kásibı biliktilikti tanýǵa arnalǵan birrettik vaýcherler usynylmaq. Bıyl 20 aqpannan bastap jańa bıznes-ıdeıalardy iske asyrý úshin óteýsiz granttar alýdyń birinshi aǵymyna ótinimderdi qabyldaý bastaldy. О́tinimderdi qabyldaý kezeń-kezeńmen 4 aǵymda, onlaın rejimde, business.enbek.kz portaly arqyly júzege asyrylady. Bıyl halyqtyń áleýmettik osal toptarynyń ishinen 132 azamat úshin granttar kózdelgen. Jalpy, jumys izdeýshiler úshin de, jumys berýshiler úshin de kórsetilgen barlyq belsendi jumyspen qamtý sharalary enbek.kz elektrondyq eńbek bırjasynyń portalynda qoljetimdi», dedi spıker.
