Jańa saıttyń jumysyndaǵy qatelik saldarynan fermerler aınalym qarajatynyń tapshylyǵyna ushyraýy múmkin. «Atameken» ulttyq kásipkerler palatasynyń habarlaýynsha, birneshe baǵyt, sonyń ishinde nesıe mólsherlemesin sýbsıdııalaý boıynsha ótinim berý múmkin bolmaı otyr.
Sharýalardyń nesıesine memleket tarapynan beriletin 16% sýbsıdııaǵa ótinish jibere almaı otyrǵan kásipkerdiń biri – Jambyl oblysyndaǵy «Dıqan nesıe» seriktestiginiń tóraǵasy Dáýlet Pernebekuly.
«Saıt baǵdarlamasy áli «shıki». Máselen, qańtar men aqpanda nesıe alǵan azamattardyń ótinishterin sýbsıdııaǵa jibere almaı otyrmyz. Aldaǵy aılarda sýbsıdııa túspese, sharýalar nesıeni taǵy da ózderi tóleýi kerek bolady. Olar úshin bul úlken aýyrtpalyq», deıdi ol.
Qyzylordalyq kásipker Almat Abdýllaev ta qazirgi sátte platformanyń paıyzdyq mólsherlemeni sýbsıdııalaý degen fýnksııasy tolyq jumys istemegendikten, ótinim tapsyra almaı otyrǵanyn jetkizdi. Onyń aıtýynsha, kásipkerler, sharýa qojalyqtary eginge, sharýashylyǵyn damytýǵa jınap qoıǵan qarajattaryn nesıesin jabý úshin tóleýge májbúr bolyp, shyǵynǵa ushyrap jatyr.
Sharýalar sýbsıdııaǵa ótinish berý úshin birneshe platforma bolsa, bul rette gosagro.kz portalymen qatar burynǵy qoldau.kz sekildi qosymsha júıeni iske qosyp, tańdaý múmkindigi berilse degen ótinish-tilekterin aıtady.
Bıyl 2 aqpanda ótken «Atameken» UKP tóralqasy agroónerkásip kesheni komıtetiniń otyrysynda da gosagro.kz portalyna qatysty ózekti máseleler kóterilgen-di.
«Bıznes qaýymdastyq ókilderi bıyl jappaı paıdalanýǵa qosylǵan gosagro.kz portalynyń daıyndyǵy tómen ekenin jáne qoldau.kz portalynyń jumysyn toqtatý úlken aǵattyq ekenin aıtyp otyr. Kóktemgi egis naýqanynyń ýaqytyly ótýine kedergi keltirip, táýekel týdyratyn bul problemany sheshý – kezek kúttirmeıtin is», deıdi palatanyń AО́K jáne tamaq ónerkásibi departamentiniń basqarýshy dırektory Erbol Eseneev.
Ulttyq kásipkerler palatasynyń AО́K jáne tamaq ónerkásibi departamentiniń sarapshysy Juldyz Áýbákirovanyń aıtýynsha, fermerlerden kún saıyn ótinishter kelip túsip jatyr.
«О́tinim berýdegi problemalar sýbsıdııalaýdyń barlyq baǵyttary boıynsha anyqtalady. Qazir tyńaıtqyshtar boıynsha ótinimderdi qabyldaý bastaldy, alaıda ár kezeńde qate paıda bolady. Aldymen qate kadastrlyq nómirler shyǵady, elektrondyq shot-faktýralar, normatıvter, jetkizýshiler kórsetilmeıdi. Árbir kezeń bıznes sýbektileri úshin problema bolyp tur. Mysaly, tyńaıtqyshtar, pestısıdter jáne tuqymdar boıynsha sýbsıdııalaýǵa ótinimderdi resimdeý úshin fermerler egistik kartasyn usynýy kerek. Biraq AgroOpen qyzmeti jer ýchaskeleri boıynsha burys aqparat beredi. Dıqandar egis alqaby, egýdi josparlap otyrǵan daqyldar týraly derekterdi kórsete almaıdy. Sonymen qatar fermerler júıege kirgen kezde, tipti óz ýchaskeleriniń aýdany boıynsha da ártúrli derekter alatynyn aıtady», deıdi ol.
Máseleni senator Evgenıı Bolgert te kóterdi. Ol óziniń depýtattyq saýalynda aýyl sharýashylyǵy taýaryn óndirýshilerdiń problemalary týraly aıtqan bolatyn.
«Jańa gosagro.kz aqparattyq júıesiniń durys jumys istemeýine baılanysty fermerler óz ýaqytynda ótinim bere almaı otyr. Onda birqatar baǵyttar boıynsha sýbsıdııa alýǵa ótinimder berýge múmkindik joq. Máselen, júıe sýbsıdııa alý úshin qajet barlyq qujattyń jıyntyǵyn qabyldamaıdy. Quny 30 mln teńgeden sál asatyn jańbyrlatyp sýaratyn mashınany satyp alý úshin sýbsıdııaǵa ótinim berý kezinde jańa gosagro.kz júıesi 46 mıllıard teńge somasyn esepteıdi. Osy oraıda, ondaǵy tıisti qyzmet mundaı qate ótinimder qabyldanbaıdy dep, birden jaýap beredi. Júıeniń qatelikterin sharýalardyń ózderi de, olardyń esepshileri de túzete almaı otyr», dedi depýtat.
Bul jaǵdaı egistikke daıyndyq tusynda, ıaǵnı sharýalarǵa janar-jaǵarmaı materıaldaryna, tyńaıtqyshtarǵa, qosalqy bólshekterge qarajat qajet bolǵan kezde kese-kóldeneń kelip otyr. Osy rette gosagro.kz aqparattyq júıesiniń jumysyndaǵy tehnıkalyq kemshilikterge Úkimet shuǵyl túrde nazar aýdarýy kerek.
