Bul týraly Grekııanyń quqyq qoǵaý organdary málimdedi. Larısa qalasynyń mańynda bolǵan poıyz apatynan keıin polısııa stansııa bastyǵyn tutqynǵa alǵan. Ol jolaýshylar poıyzyn qatelesip durys emes jolǵa baǵyttaǵanyn aıtyp, kinásin moıyndady.
«Men qatelesip, jolaýshylar poıyzyn basqa jolǵa baǵyttap jiberdim», dedi stansııa bastyǵy.
Kináli 2 naýryzda tergeledi. Grekııanyń Qylmystyq kodeksiniń 291-babyna sáıkes, tasymaldaý qaýipsizdigin buzyp, birneshe adamnyń ólimine ákep soqtyrǵan aýyr qylmys jasaǵany úshin qylmystyq is qozǵaldy. Oǵan 10 jyldan bastap ómir boıyna bas bostandyǵynan aıyrý jazasy kesilýi múmkin.
Sonymen qatar Grekııa kólik departamentiniń basshysy Kostas Karamanlıs Tempıdegi temirjol apatynan soń otstavkaǵa ketetinin málimdedi.
Júk poıyzy men jolaýshylar poıyzy Larısa qalasynyń mańyndaǵy Tempı qalasynda soqtyǵysqan. Saldarynan poıyz relsten shyǵyp, keıbir vagondar órtenip ketti. Sońǵy málimetter boıynsha, 36 adam qaıtys boldy, 66 adam aýrýhanaǵa jatqyzyldy, olardyń altaýy reanımasııada.
