Taraptar ónerkásip jáne jer qoınaýyn paıdalaný salasyndaǵy áriptestikti nyǵaıtý máselelerin qarastyrdy. Sondaı-aq atalǵan baǵyttarǵa sáıkes Qazaqstanǵa ınvestısııa tartýdyń múmkindikteri pysyqtaldy. Ásirese vedomstvo basshysy bıyl mınıstrlik qatty paıdaly qazbalardyń 25 ken orny boıynsha jer qoınaýyn paıdalanýǵa quqyq beretin aýksıon ótkizetinin jetkizip, onyń onlaın formatta uıymdastyrylatynyna basa nazar aýdardy.
«Atalǵan aýksıon onlaın rejimde, ıaǵnı ashyq túrde ótkiziledi. Oǵan elimiz ben sheteldik ınvestorlar qatysa alady. Jer qoınaýyn ıgeretin ınvestorlarǵa qoıylatyn basty talaptardyń biri – óndiriletin mıneraldy resýrstar halyqtyń ál-aýqatyn arttyrýǵa septigin tıgizýi tıis. Demek, birinshi kezekte jańadan ashylatyn óndiris oryndarynda jergilikti turǵyndar jumyspen qamtylýy qajet. Ekinshiden, sol halyqtyń pikirin eskerip, jergilikti áleýmettik máselelerdiń sheshilýine atsalysýy kerek», dedi mınıstr.
Sondaı-aq vedomstvo basshysy aýksıonǵa qoıylatyn paıdaly qazbalarǵa baılanysty shaǵyn aqparattyq materıaldar daıyndalǵanyn qosa aıtty. Bul arqyly áleýetti jer qoınaýyn paıdalanýshy kez kelgen ken ornyna qatysty málimetpen tanysyp, soǵan sáıkes ózine qajetti lotqa qatysa alady. Atalǵan ashyq saýdanyń artyqshylyǵy – adamı faktordyń oryn alýyna jol bermeıdi.
Kezdesýdiń sońynda taraptar iskerlik áńgimege rızashylyqtaryn jetkizip, ekonomıkalyq qarym-qatynasty odan ári damytýdyń mańyzdylyǵyn atap ótti.
