Úkimet qaýlysymen Samruk-Kazyna Construction «Jaıly mektep» ulttyq jobasy negizinde salynatyn mektepter qurylysynyń dıreksııasy bolyp anyqtalǵany belgili. Kompanııanyń basqarma tóraǵasy Máýlen Aımanbetovtiń aıtýynsha, qazir jobany júzege asyrý úshin jergilikti atqarýshy organdarmen kelisimsharttar jasalyp jatyr.
«Kelisimsharttyń máni – ákimdikter tapsyrys berýshiniń mindetin atqaratyndyǵynda. Biz barlyq qajetti konkýrstardy ótkizemiz. ERS-kelisimshartynda jobalaýdan bastap, qurylys jáne qural-jabdyqpen qamtýǵa deıingi barlyq jumys qarastyrylady. Bul aýyl men qalada, megapolıste salynatyn mekteptiń bári oqýshylarǵa biryńǵaı standarttaǵy jaılylyqty teńdeı qarastyrady», dedi M.Aımanbetov.
Mektep jobalary oqýshy sanyna qaramastan bir tıptes bolady. Sáýlettik dızaıny da ortaq. Zamanaýı jıhazdar, qural-jabdyqtar, beınebaqylaý júıesi bolýy shart. Árbir mektepte STEM-zerthana, robottehnıka bólmeleri, sport jáne jattyǵý zaldary, kovorkıng ortalyqtary bolady. Erekshe balalarǵa kedergisiz orta qalyptastyrý da nazarda.
Sonymen aldaǵy jyldary aımaqta túrli syıymdylyqtaǵy jaıly mektepter salynady. Olardaǵy oqýshy sany 300-den bastap 2 myń orynǵa deıin jetedi. Bıyl Qaraǵandyda – 4, Balqashta – 1, Buqar jyraýda – 3, Shet aýdanynda 2 mekteptiń qurylysyn bastaý josparda tur. Osy jyly irgetasy quıylǵan bilim ordalary 2024 jyly tapsyrylýǵa tıis. Sondaı-aq 2024-2025 jyldarǵa taǵy 8 mekteptiń qurylysy josparlanǵan. Olar Qaraǵandyda, Abaıda, Qarqaralyda, Prıozerskide, Nurada salynady.
Oblys ákimi Ermaǵanbet Bólekpaevtyń aıtýynsha, aımaqta «Jaıly mektepti» júzege asyrý úshin jol kartasy bekitilmek. Ulttyq joba arqyly úsh aýysymdaǵy, apatty jaǵdaıdaǵy mektepter joıylady jáne oryn tapshylyǵy máselesi retteledi.
Jalpy, bul ulttyq jobadaǵy qurylystardy iske asyrýda otandyq ónimder qoldanylmaq. Máselen, búginde Qaraǵandy oblysynda 500-ge jýyq kompanııa yqtımal ónim berýshi tiziminde tur. Mundaı tizimdi oblystyń kásipkerler palatasy jasaqtaıdy. «Jıhaz shyǵaratyn otandyq óndirýshilerdiń tizilimi jasalyp jatyr. Aldaǵy ýaqytta olar «Jaıly mektep» jobasyn iske asyrý kezinde Samruk-Kazyna Construction-ǵa usynylady. Búginde Qaraǵandy oblysynan osy tizimde 495 kompanııa endi», dep habarlady oblystyń kásipkerler palatasy.
Qaraǵandy oblysy
