Oǵan joǵary oqý oryndarynyń qazaq tili oqytýshylary, doktoranttary, magıstranttary, memlekettik tildi oqytý ortalyqtary men ǵylymı ınstıtýttardyń qyzmetkerleri men bolashaq til mamandary qatysty. Semınardyń maqsaty – qazaq tilin joǵary oqý oryndarynda praktıkalyq jáne kásibı oqytýdyń ózekti máselelerin taldaý, tájirıbemen bólisý, qazaq tilin sheteldik azamattarǵa oqytýdyń tıimdi joldaryn qarastyrý.
Nazarbayev University Qazaq tili jəne túrkitaný kafedrasynyń professory, fılologııa ǵylymdarynyń doktory Elmıra Orazalıevanyń aıtýynsha, is-sharanyń ereksheligi – mektep pen joǵary oqý oryndary, sondaı-aq sheteldegi qazaq tili oqytýshylarynyń yntymaqtasqan aıryqsha bir modelin jasaý. Bul qazaq tili oqytýshysynyń jańa beınesin ǵana emes, tulǵalyq ósýin somdaıdy.
«Qazaq tili oqytýshysynyń jańa portreti nemese tulǵalyq ósýdiń máni zor. О́ıtkeni ol dástúrli jolmen jańa tehnologııany sabaqtastyryp, zaman talabyna saı biliktiligin damytady. Sondaı-aq pánaralyq baılanysta qazaq tilin jańa ǵylym keńistigine alyp shyǵady. Sondyqtan ondaı oqytýshyny segiz qyrly, bir syrly dep aıtýǵa bolady. Bizdiń maqsatymyz – qazaq tili men ádebıeti muǵaliminiń boıyndaǵy san túrli erekshelikpen qoǵamdaǵy jańa bir kelbetin somdap shyǵarý», deıdi professor.
Oflaın jáne onlaın formatta ótken semınar «Tildik bilim berý jáne kásiptik baǵdar», «Tildik bilimdi baǵalaýdyń ádis-tásilderi», «Sóıleý áreketin damytýdyń tıimdi joldary», «Qazaq tili – ǵylym tili: ádistemelik sabaqtastyq» jáne «Fılologııa: ǵylymı zertteýler sabaqtastyǵy» dep atalatyn bes baǵyttan turǵanyn atap óteıik.
Keńeste qazaq tili oqytýshylarynyń óz keńistiginde qalyp qoımaı, órkenıetti elderdiń tájirıbesin alyp, ony sabaq barysynda utymdy paıdalana bilý sııaqty máseleler qozǵaldy. Osy taqyryptarda bilikti mamandardyń dáristeri tyńdaldy.
«Biz semınar taqyrybyn ýaqyt talabyna saı alyp otyrmyz. О́ıtkeni oqytýshylar yqpaldastyq arqyly til oqytýdyń tehnologııalaryn meńgerip, qazaq tilin ǵylymı keńistikke shyǵarýdyń jolyn bilýi qajet. Qazir qazaq tilin ǵylym tilinde damytýdy jıi aıtamyz. Mysaly, semınarǵa ǵarysh salasynyń bilikti mamandary kelip dáris oqydy jáne olar «Ǵarysh salasy qanshalyqty qazaq tilinde sóıleıdi?» degen máseleni kóterdi. Sondaı-aq naqty ǵylymdar salasynda da qazaq tilinde tolyqqandy aqparat alyp júrmiz be? Bul da oılandyrady. Shyn máninde, qazaq tiliniń ıntegrasııalyq kórinisi – pánaralyq sabaqtastyqta. Sonymen birge ǵylymaralyq baılanys bolýy kerek. Sol kezde qazaq tiliniń keńistiginde yqpaldastyq qanat jaıady», dedi E.Orazalıeva.
