Medısınalyq avıasııa jelisi boıynsha Ulttyq shuǵyl medısınany úılestirý ortalyǵynyń kómegine júginetin pasıentter – bul respýblıkanyń medısınalyq uıymdarynda aýyr nemese asa aýyr jaǵdaıda júrgen, oblystyq nemese respýblıkalyq klınıkalarda mamandandyrylǵan nemese joǵary tehnologııalyq emdeýdi qajet etetin adamdar.
Densaýlyq saqtaý mınıstrliginiń habarlaýynsha, ótken jyly 4 420 pasıentke sanıtarlyq avıasııanyń kómegi kórsetilipti. Onyń ishinde 1 468 (33%) patologııasy bar balaǵa, 730 (17%) jaraqattanǵan, jazataıym oqıǵalarmen jáne ýlanýmen aýyratyn pasıentke, 859 (19%) akýsherlik praktıkadaǵy shuǵyl jaǵdaılar boıynsha pasıentke, 560 (13%) qanaınalym júıesi aýrýlary bar pasıentke, 517 (12%) jańa týǵan pasıentterge, 286 (6%) basqa aýrýlary bar pasıentke medısınalyq kómek kórsetildi.
Jalpy, 2022 jyldyń qorytyndysy boıynsha 5 230 medısınalyq qyzmet oryndaldy. Onyń ishinde medısınalyq uıymdarǵa 2 381 pasıent (45%) tasymaldandy, 153 kúndizgi konsýltasııa (3%) ótkizildi, 205 operasııa (4%) oryndaldy, 2 491 (48%) qashyqtyqtan medısınalyq qyzmet uıymdastyryldy.
Halyqqa konsýltasııalyq jáne jedel medısınalyq kómek kórsetý úshin Astana, Almaty qalalarynyń respýblıkalyq klınıkalary men medısınalyq uıymdarynan 251 maman tartyldy.
Medısınalyq avıasııa jumysy pasıentterdi tasymaldaý, betpe-bet konsýltasııalar, operasııalar júrgizý, qashyqtyqtan medısınalyq qyzmetter kórsetý, donorlyq aǵzalar men bıomaterıaldardy tasymaldaý sııaqty baǵyttarda júrgiziledi. Búgingi tańda respýblıka boıynsha ortasha medısınalyq avıasııa táýligine 15 ushýǵa deıin júzege asyrylady.
Byltyr medısınalyq avıasııa nysanynda qajetti qyzmetter kórsetý úshin Ulttyq shuǵyl medısınany úılestirý ortalyǵynyń dıspetcherlik qyzmetine 2 985 ótinim kelip tústi. Onyń 628-inen bas tartyldy (meteojaǵdaılar, tehnıkalyq sebepter, pasıenttiń jaı-kúıiniń nasharlaýy jáne t.b.).
2022 jyldyń qorytyndysy boıynsha medısınalyq avıasııa 2 357 qyzmetti oryndasa, onyń ishinde tikushaqtarmen – 470, ushaqtarmen 1 887 ret ushty. Bul rette 41 ushýdy Azamattyq avıasııanyń turaqty reısteriniń áýe kemeleri oryndaǵanyn atap ótken jón.
Respýblıka shegindegi medısınalyq avıasııa reısterinen basqa, shetelderdegi medısınalyq uıymdarda asa aýyr jaǵdaıda júrgen Qazaqstan azamattary men qandastardy halyqaralyq tasymaldaý júzege asyrylady. Byltyr sheteldik klınıkalardan medısınalyq avıasııa otandyq medısınalyq uıymdarda emdeýdi jalǵastyrý úshin Qazaqstannyń 16 azamatyn tasymaldady.
Al donorlyq aǵzalardy alý jónindegi mamandardy tasymaldaý úshin 5 ushý jáne bıomaterıaldy 1 tasymaldaý oryndaldy.
Medısınalyq avıasııanyń múddesi úshin 2022 jyly 33 áýe kemesi, ıaǵnı 20 ushaq jáne 13 tikushaq paıdalanyldy. Barlyq paıdalanylatyn áýe kemeleri elimizdiń Azamattyq avıasııa komıtetinde sertıfıkattalǵan.
Ahýaldyq ortalyqtyń qyzmetkerleri táýlik boıy kúsheıtilgen rejimde aýyr jaǵdaıdaǵy pasıentter úshin telefon arqyly 33 143 konsýltasııa uıymdastyrdy. Ahýaldyq ortalyq turaqty negizde elimizde bolǵan tótenshe jaǵdaılarǵa kúndelikti monıtorıng júrgizedi.
El azamattaryna medısınalyq avıasııa nysanynda shuǵyl medısınalyq kómek kórsetý tegin medısınalyq kómektiń kepildik berilgen kólemi sheńberinde júzege asyrylady.
