Sýretti túsirgen Erlan OMAR, «EQ»
Bul týraly Ortalyq kommýnıkasııalar qyzmeti alańynda ótken brıfıngte Qarýly kúshter bas shtaby Uıymdastyrý-jumyldyrý jumystary departamentiniń bastyǵy Baýyrjan Artyqov málimdedi.
«Jergilikti atqarýshy organdarynyń 195 áskerge shaqyrý pýnktinde qalalyq jáne aýdandyq áskerge shaqyrý komıssııalary óz jumysyn bastaıdy, oǵan ákimderdiń orynbasarlary basshylyq etedi. Áskerge shaqyrylýǵa tıisti er azamattardy habardar etý derbes shaqyrtý qaǵazyn joldaý arqyly júzege asyrylady. Shaqyrtý qaǵazy olardyń turǵylyqty mekenjaıyna nemese jumys oryndaryna jetkiziledi. Bul rette osy úderisti avtomattandyrý maqsatynda 2021 jyldan bastap áskerge shaqyrylýshylardy SMS-habarlama joldaý arqyly da habardar etý jalǵasyp jatyr», dedi spıker.
Jalpy, Qarýly kúshterge 7 myńnan astam, Ulttyq ulanǵa 6 myńnan astam, UQK Shekara qyzmetine 3 myńnan astam, Tótenshe jaǵdaılar mınıstrligine 300-den astam, Memlekettik kúzet qyzmetine 80-nen astam adam shaqyrylmaq. Jıynda Qorǵanys mınıstrligi pılottyq rejimde proaktıvti formatta áskerge shaqyrýdy keıinge qaldyrýdy usyndy. Mundaı jańashyldyq memlekettik organdarmen jáne Sıfrlyq damý jáne aeroǵarysh ónerkásibiniń «SmartDataUkimet» aqparattyq-taldaý júıesimen ózara is-qımyl jasaýdy uıymdastyrýdyń nátıjesinde iske qosylǵan.
Qorǵanys mınıstriniń orynbasary Darhan Ahmedıev merzimdi áskerı qyzmetke shaqyrýdy keıinge qaldyrý jáne odan bosatý «Áskerı qyzmet jáne áskerı qyzmetshilerdiń mártebesi týraly» Zańnyń 35 jáne 36-baptaryna sáıkes Elektrondyq úkimet portaly arqyly kórsetiletin memlekettik qyzmet ekenin eske saldy. «Eger buryn azamattar áskerı komıssarıattarǵa baryp, áskerge shaqyrýdy keıinge qaldyrýǵa quqyly ekenin dáleldeý qajet bolsa, bıyldan bastap memlekettik organdardyń derekqorlaryn «SmartDataUkimet»-pen ıntegrasııalaý arqyly azamattardy merzimdi qyzmetten avtomatty túrde bosatýǵa múmkindik bar», dedi spıker.
Qorǵanys vıse-mınıstriniń aıtýynsha, alynǵan málimetter negizinde «SmartDataUkimet» segmentteýdi júrgizedi jáne bilim berý uıymdarynda jalpy orta bilim alyp júrgen azamattardy; tehnıkalyq jáne kásiptik, orta bilimnen keıingi nemese joǵary bilim alyp júrgen azamattardy; nekede turǵan jáne bir jáne odan da kóp balasy bar azamattardy; mektepke deıingi bilim berý uıymdarynda, orta (bastaýysh, negizgi orta, jalpy orta), tehnıkalyq jáne kásiptik, orta bilimnen keıingi bilim berý uıymdarynda kásiptik qyzmetin júzege asyratyn pedagogterdi avtomatty túrde alyp tastaı otyryp, potensıaldy áskerge shaqyrylýshylardyń tizimin jasaıdy. «Stýdentter búginnen bastap avtomatty rejimde áskerı qyzmetke shaqyrýdy keıinge qaldyrýǵa negiz bar ekendigi týraly SMS-habarlama alady. Olar buǵan kelisýi de, kelispeýi de múmkin», dedi spıker.
Qazirgi ýaqytta zańdy túrde áskerı qyzmetke shaqyrýdy keıinge qaldyrý quqyǵy bar 300 myńnan astam stýdent anyqtalǵan. Memleket basshysy qoıǵan mindetterdi iske asyrý aıasynda Qorǵanys mınıstrligi merzimdi áskerı qyzmet ótkerýdiń tartymdylyǵyn arttyrý boıynsha birqatar is-sharany iske asyrdy. Eń aldymen, bul merzimdi áskerı qyzmet sarbazdary qyzmet ótkergennen keıin 2 jyl ishinde JOO-ǵa UBT-syz, konkýrssyz oqýǵa túsý múmkindigi. «Byltyr Qorǵanys mınıstri joǵary oqý oryndarynyń basshylyǵymen birqatar kezdesýler ótkizdi. Merzimdi qyzmettegi sarbazdar úshin 3 myń grant beretin elimizdiń 41 JOO-men memorandým jasaldy. Áskerı boryshyn óteý kezinde úzdik nátıje kórsetkender joǵary oqý oryndaryna tegin túsý múmkindigine ıe bolady», dedi qorǵanys vıse-mınıstri.
Sondaı-aq áskerı kafedralarǵa konkýrstan tys túsý múmkindigi beriledi. «Merzimdi áskerı qyzmet sarbazdaryna tutynýshylyq nesıelerdi, shaǵyn qaryzdardy tóleý boıynsha tólemderdi 13 aıǵa keıinge qaldyrý múmkindigi beriledi. 12 aı áskerde bolý merzimi jáne sarbaz jumysqa ornalasyp, nesıeleri boıynsha tólemdi jalǵastyra alýyna 1 aı qarastyrylǵan. Búginde 3,5 myń áskerı qyzmetshi osy múmkindikti paıdalandy, 5 myńǵa jýyq nesıe boıynsha tólemder keıinge qaldyryldy», dedi spıker.
