Sapar barysynda OSK músheleri Parlament Májilisi men máslıhattary depýtattarynyń kezekten tys saılaýyn ázirleý men ótkizý máseleleri boıynsha jergilikti jerlerde kóshpeli semınar-keńester ótkizdi. Is-sharaǵa jergilikti atqarýshy organdardyń ókilderi, oblys prokýratýralarynyń qyzmetkerleri, aýmaqtyq saılaý komıssııalarynyń músheleri, kandıdattardyń saılaýaldy shtabtarynyń ókilderi, halyqaralyq baıqaýshylar men BAQ ókilderi qatysty.
Komıssııa músheleri semınarǵa qatysýshylarǵa saılaý zańnamasynyń barlyq jańalyqtaryn, saılaý aldyndaǵy úgitti qarjylandyrý máselelerin túsindirdi, 29 birmandattyq okrýgte kandıdattardy tirkeý boıynsha qorytyndylardy jetkizdi, sondaı-aq aldaǵy saılaýǵa daıyndyq boıynsha atqarylǵan jumys týraly óńirlerdiń esepterin tyńdady.
Pavlodar oblysy ákimi apparatynyń basshysy Dıdar Ibraevtyń málimdeýinshe, qalalar men aýdandardyń ákimdikterinde Call-ortalyqtar iske qosylǵan.
– «109 biryńǵaı baılanys ortalyǵy» bazasynda táýlik boıy arnaıy baılanys jelisi, telegram-botta JSN boıynsha izdeý servısi jumys isteıdi. 25 aqpanda 512 200 adamnan turatyn saılaýshylar tizimi ýchaskelik saılaý komıssııalaryna berildi, – dedi apparat basshysy.
Ol sondaı-aq saılaýdy ótkizýge barlyq 523 saılaý ýchaskesi tartylatynyn atap ótti. Olardyń barlyǵy materıaldyq-tehnıkalyq qamtamasyz etilgen, onyń ishinde múgedektigi bar adamdardyń qajettilikteri eskerilgen.
– Oblys boıynsha daýys berý kezinde erekshe jaǵdaılarǵa muqtaj 3 200 múgedektigi bar saılaýshy bar (899 kreslo-arbany paıdalanýshylar, 1 553 kórý qabileti buzylǵan jáne 784 estý qabileti buzylǵan). Barlyq saılaý ýchaskeleri múmkindigi shekteýli azamattardyń kedergisiz kirýine bar jaǵdaı jasalǵan ǵımarattardyń birinshi qabattarynda ornalasqan, – dedi Dıdar Ibraev.
Múgedektigi bar adamdarǵa yńǵaıly bolý jáne olardy saılaý ýchaskelerine jetkizý úshin daýys berý kúni «Invataksı» qyzmeti kórsetiletin bolady. Estý jáne kórý qabileti nashar adamdar úshin ár ýchaskede dıagonaly 54 sm kompıýterler, qulaqqaptar, úlkeıtkishter, Braıl shrıfti trafarettermen jabdyqtalǵan buryshtar da daıyndalǵan.
Naýqandy ótkizý kezeńinde saılaý ýchaskelerine bara almaıtyn múgedektigi bar adamdarǵa daýys berýge arnalǵan tasymaldanatyn jáshigi bar kóshpeli komıssııalar uıymdastyrylady.
Sondaı-aq keńes barysynda oblys prokýrorynyń birinshi orynbasary Talǵat Álibaev sóz sóılep, saılaý úderisine qatysýshylardyń zańnamany saqtaýyn qamtamasyz etý jónindegi qadaǵalaý organynyń qyzmeti týraly habardar etti.
Al Astana qalasynda ótken semınar-keńes barysynda OSK músheleri aýmaqtyq saılaý komıssııalary úshin naqty keıster negizinde iskerlik oıyn túrinde trenıngter uıymdastyrdy. Semınar-keńes sońynda Ortsaılaýkomnyń músheleri aýmaqtyq saılaý komıssııalarynyń múshelerin qyzyqtyrǵan suraqtarǵa jaýap berdi.
