Keńeste atalǵan baǵyttyń qazaqstandyq bóligindegi belsendi jumystyń arqasynda respýblıka aýmaǵy boıynsha tranzıttik júkterdiń ótý merzimi 12 kúnnen 6 kúnge deıin, ıaǵnı, ótken jylmen salystyrǵanda eki ese qysqarǵany atap ótildi. Sonymen qatar 2023 jyldyń qorytyndysy boıynsha bul kórsetkishti 5 kúnge deıin jetkizý josparlanýda.
Jalpy, THKB sheńberinde Qytaıdan Qara teńizdegi porttarǵa júkterdi jetkizý merzimi 38-53-ten 19-23 kúnge deıin qysqardy, al osy jyldyń sońyna qaraı 14-18 kúnge jetýi tıis. Mundaı ilgerileý qatysýshy elderdiń baǵyttaǵy kedergilerdi joıý, ótpeli tarıfterdi engizý jáne basqa da sharalardy júzege asyrý boıynsha birlesken jumysynyń arqasynda múmkin boldy.
Keńeske qatysýshylar Qazaqstannyń temirjol ınfraqurylymyn odan ári jańǵyrtý, jyljymaly quram parkin jańartý, saýda flotyn jáne Aqtaý men Quryq porttarynyń qýatyn arttyrý jónindegi sharalardy talqylady.
Atap aıtqanda, Aqtaý portynda konteınerlik hab qurý, qaıta tıeý tehnıkasynyń parkin jańartý jáne munaı quıý aılaqtaryn qalpyna keltirý, al Quryq portynda jańa aılaq salý, kópfýnksıonaldy jáne astyq termınaldaryn iske qosý josparlanýda. Sondaı-aq 2030 jylǵa deıin Kaspııde 10 munaı quıý barjasy, 8 parom, 6 tanker jáne konteınerlik keme jumys isteı bastaıdy dep kútilýde.
Premer-mınıstr bul qujatty memleketaralyq deńgeıde odan ári pysyqtaý úshin ony QR memlekettik jaýapty organdarymen kelisý rásimderin jedeldetý qajettigin atap ótti.
