Ǵanı Beısembaev 2025 jylǵa deıin elimizde «Jaıly mektep» baǵdarlamasy boıynsha 401 mektep salý josparlanǵanyn aıtty. Sol arqyly bilim uıalary álemdik úlgidegi ozyq mektepterdiń deńgeıine jetpek. Budan bólek 7 myń mektep bilim berýdiń ınnovasııalyq tehnologııalaryna kóshedi. Sonyń ishinde aýyl mektepteriniń materıaldyq-tehnıkalyq bazasyn nyǵaıtý, qajetti qural-jabdyqtarmen jaraqtandyrý jaǵynan olardy qala mektepterinen qalys qaldyrmaý da mınıstrliktiń kún tártibinen túspek emes. Atalǵan maqsatqa oraı osy jyldan bastap aýyl mektepteriniń oqýshylaryna arnaıy respýblıkalyq olımpıada uıymdastyrylady. Mınıstr bolashaq pedagogterdi daıyndaıtyn joǵary oqý oryndary keleshek mamandardyń sapasyna jiti nazar aýdarý keregin jetkizdi.
Is-sapar barysynda mınıstr Shymkent qalalyq polısııa departamentinde boldy. Departament bastyǵy Qaırat Dálbekov Oqý-aǵartý mınıstrine Jedel basqarý ortalyǵynyń jumysymen tanystyrdy.
– Megapolıste 246 mektep bar, sonyń 151-i – memlekettik, qalǵan 95-i – jekemenshik bilim uıalary. Atalǵan mektepter beınebaqylaý kameralarymen jáne SOS dabyl túımelerimen tolyqtaı jabdyqtalǵan ári polısııa departamentiniń Jedel basqarý ortalyǵyna qosylǵan. Beınebaqylaý ınspektory árbir is-qımyldy qadaǵalap otyrady. Mundaı shara eń aldymen balalardyń qaýipsizdigin qamtamasyz etý úshin kerek. Osynyń nátıjesinde byltyr kámeletke tolmaǵandar arasyndaǵy qylmystar men quqyq buzýshylyqtardyń sany shamaly azaıdy. Degenmen, sheshimin tappaǵan máseleler de joq emes. Máselen, ınternet jyldamdyǵy nashar. Búginde jedel basqarý ortalyǵynyń qyzmeti tikeleı sıfrlyq júıeniń sapasyna baılanysty bolyp otyr. Ekinshi másele kúzet agenttigi mamandarynyń kásibı sheberligine qatysty. Olardyń tarapynan keıde jaqsy jumys nátıjesimen kórine almaý da qaýipsizdik salasynda másele tolyq sheshilmegenin ańǵartady. Mektepter kúzet agenttikterimen tikeleı kelisimshart jasaıtyndyqtan kásibı sheberlikti arttyrýǵa da basa kóńil bólgen jón, – dedi Q.Dálbekov.
Ǵ.Beısembaev qala ákimdiginiń ókilderinen polısııaǵa jáne bilim basqarmasyna aqparattyq-kommýnıkasııalyq jelilerdiń sapasyn jaqsartýǵa kómek kórsetýin surady. Sondaı-aq mınıstr beınekameralardy ornatý kezinde olardyń sapasyn da nazardan tys qaldyrmaýǵa shaqyrdy jáne oqýshylar sany mekteptiń shynaıy múmkindiginen asyp ketpeýi keregin eskertti. «Shymkent balalar úshin qaýipsiz qala bolýǵa tıis», dedi ol.
Sondaı-aq vedomstvo basshysy «SOS» túımesiniń qalaı jumys isteıtinin tekserip kórdi. Ol tórt myńnan astam oqýshy oqıtyn qaladaǵy Pýshkın atyndaǵy №1 mektep-gımnazııasymen shuǵyl baılanysqa shyqty.
Sapar aıasynda mınıstr qaladaǵy №65 mektep-gımnazııasynyń janynan qosymsha salynyp jatqan ǵımarat qurylysymen tanysty. О́tken jyldyń naýryz aıynda irgetasynyń qazyǵy qaǵylǵan bilim ordasynda keleshekte 600 bala oqıdy. Al onyń qurylysy josparǵa sáıkes bıylǵy jyldyń sońyna deıin aıaqtalady dep otyr.
ShYMKENT
