Kollajdy jasaǵan Qonysbaı ShEJIMBAI, «EQ»
Qazir elimizde erekshe qamqorlyqqa zárý jandardy qoldaý úshin memleket tarapynan atqarylyp jatqan ıgi sharalar barshylyq. Alaıda memleketke ǵana qol jaıyp qarap otyra berý jaǵdaıdy jaqsartyp jibermesi anyq. Osy rette álemdik tájirıbege zer salsaq, Japonııa, Germanııa jáne TMD elderiniń birazynda iri kompanııalardyń demeýimen konsýltasııalyq qoldaý ortalyqtary jumys isteıtinin kóremiz. Endi mine, osyndaı ortalyqtar bizdiń elimizde de ashyla bastady.
Qoldau konsýltasııalyq ortalyǵy – qamqorshylarǵa, kásibı kútim jasaıtyn mamandarǵa, áleýmettik qyzmetkerler men eriktilerge arnalǵan oqytý baǵdarlamalaryn usynatyn alǵashqy mekemelerdiń biri. Onda qımyl-qozǵalysy kúrdeli adamdar men olardyń jeke kómekshilerin jan-jaqty qoldaý úshin barlyq jaǵdaı jasalǵan. Aýyr naýqastarǵa, qarttarǵa jáne múgedekterge durys kútim jasaý úshin tek qural-jabdyqtar ǵana emes, tájirıbeni de qajet etedi. Munda kez kelgen adam qart týystarymen múgedek adamdardy kútý jáne ońaltý boıynsha keńes ala alady. Oǵan qosa áleýmettik qyzmetter portalynda (ÁQP) memlekettik kómek alýǵa qalaı ótinish berý kerektigin de túsindirip, tegin kómek kórsetedi.
– Mundaı ortalyqtar órkenıetti qoǵam úshin óte qajet. Bul – halyqtyń qajetti jáne mańyzdy tetikterin ınvestısııalaýǵa, damytýǵa daıyn jeke ortalyq. Kómekke muqtaj adamdarǵa qandaı quraldardy qoldaný qajet ekeni kásibı túrde úıretilse, bul árqashan suranysqa ıe boldy, – deıdi Astana qalasy Jumyspen qamtý jáne áleýmettik qorǵaý basqarmasynyń basshysy Ilıa Skýb.
Ortalyq qyzmetkerleriniń aıtýynsha, bul jobanyń ashylǵanyn eń birinshi bolyp Astana medısına ýnıversıteti qoldapty. О́ıtkeni qazir munda jeke kómekshiler ǵana emes, medısına mamandary da dáris alady. Osy rette Astana medısına ýnıversıtetiniń rektory Kamaljan Nadyrov: «Ýnıversıtet ortalyqty saraptamalyq súıemeldeýdi qamtamasyz etýge, mamandardyń biliktiligin jetildirý kýrstaryn ótkizýge, sondaı-aq jumysqa erikti stýdentterdi tartýǵa daıyn», deıdi.
Astanadaǵy Qoldau konsýltasııalyq ortalyǵynyń jetekshi mamany Nazıra Berikqyzy qazir ortalyqqa medısınalyq joǵarǵy oqý oryndarynyń stýdenteri kóptep keletinin aıtady.
– Azamattar jeke kómekshi bolý úshin nemese bul jónindegi qajetti aqparattardy alý úshin Qoldau konsýltasııalyq ortalyǵynyń resmı portalyna tirkelgennen keıin kez kelgen adam tolyqtaı aqysyz negizde kútim jasaýdyń praktıkalyq daǵdylaryn úırene ala alady. Oqýdan ótkenderdiń barlyǵyna sertıfıkat beriledi – deıdi ol.
Bul ortalyq qoǵamdyq uıym bolǵanymen, memlekettik mekemelermen tyǵyz baılanysta. Atap aıtqanda, Almaty qalasy Áleýmettik ál-aýqat basqarmasy, Astana qalasy Jumyspen qamtý jáne áleýmettik qorǵaý basqarmasy jáne áleýmettik mekemeler (mysaly, qarttar úıi), Belsendi jáne uzaq ómir súrý ortalyqtarymen, qoǵamdyq múgedekter birlestikterimen birlese jumys isteıdi.
– Múgedektigi bar adamdarǵa, tósek tartyp jatqan aýyr naýqastarǵa jáne qart kisilerge kútim jasaıtyn qamqorshylarǵa túrli semınar ótkizýmen qatar, basqa da ortalyqtyń beretin keńesteri bar. Máselen, múgedektigi bar adamdarǵa memleket tarapynan beriletin ıgilikterdi durys ıgerý, ıaǵnı aqparattyq qoldaý jáne tıisti qujattardy tıimdi rásimdeýge keńes beriledi. Mysaly, memleketten kepildik berilgen tehnıkalyq ońaltý quraldaryn jáne ÁQP jumysy arqyly ótinishti durys resimdeý sekildi jumystarǵa da qoldaý kórsetemiz, – deıdi N.Berikqyzy.
Ortalyqtyń kútýshilerge úıretetin úlgisi kóp. Ásirese tósek tartyp jatyp qalǵan naýqastyń janbasy oıylyp ketýi nemese nesebin toqtata almaı qalý sekildi jaǵdaılarda qandaı shara qoldanýǵa bolatynyn kásibı túrde úıretedi. Mamandar mundaı qajetti tájirıbeni jasyryp qalmaı, qýana-qýana úıretýge daıyn. Bul naýqas adamdardyń kútimin jasaıtyn kútýshiler úshin úlken demeý ekeni sózsiz.
– Tósek-oryn jabdyǵyn únemi aýystyryp turý jáne untaqpen jýý kerek. Kir tósek jaımalary tek deneniń oıylýyna ǵana emes, basqa da dermatologııalyq aýrýlarǵa ákelip soǵýy múmkin. О́ıtkeni naýqas tósegi zııandy mıkroorganızmderdiń uıasy deýge de bolady. Al naýqas adam kishi jáne úlken dáretin toqtata almaýdan zardap shekse, bir rettik tósenish nemese eresekterge arnalǵan pampers sııaqty gıgıena quraldaryn paıdalanýdyń da ózindik tártipteri baryn eskertemiz, deıdi mamandar.
Qazir bul ortalyqtan tájirıbe alyp jatqandardyń aıtar alǵysy mol. Onyń biri áleýmettik qyzmetker Laýra Aqjanqyzy Qoldau kásibı jumysyna oń baǵasyn berip otyr. Sonymen birge múgedektigi bar adamdardyń jeke kútýshileri de osy ortalyqtan kóp tájirıbe jınaýǵa bolatynyn aıtady.
– Meniń anam onkologııalyq dertpen aýyrady. Qazir sol qart kisiniń kútimin jasap otyrmyn. Qoldau konsýltasııalyq ortalyǵynyń 3 saǵattyq semınaryna qatysyp, biz bile bermeıtin kóptegen jaıttyń baryna kózim jetti. Bul – biz úshin taptyrmaıtyn múmkindik. Ortalyqtaǵy mamandarǵa alǵysymyz zor, – deıdi jeke kútýshi Z.Muqashova.
Qazaqstan aýmaǵyndaǵy Qoldau konsýltasııalyq ortalyqtarynyń basshysy Anatolıı Jýravlev mundaı qamqorlyq ortalyqtary TZMO SA kompanııasynyń qoldaýymen qurylǵanyn aıtty.
– Qamqorlyq pen kútim – aýyr jáne óte jaýapty jumys. Qoldau ortalyǵy jaqyndarynda múgedektigi bar adamdardyń kútimin jasaýda mol septigin tıgizetin dárister usynady. Naýqas adamnyń kútimin jasaý – otyrǵyzyp-turǵyzyp, tamaqtandyryp, dárilerin berýmen ǵana shektelmeıdi. Úı jaǵdaıynda jasalatyn túrli em-sharalary bar. Ol saýatty ári kásibı jasalmasa bolmaıdy. Sondyqtan mundaı adamdarǵa kásibı qoldaý qajet. Barlyq tilek bildirýshilerdi jáne mundaı qoldaýdy qajet etetin azamattardy bizdiń ortalyqtarda tegin tirkelip, sapaly semınarlardan ótýge shaqyramyz, – deıdi A.Jýravlev.
