«Aımaqta ustazdyqty kásip emes, uly qyzmet sanaıtyn kim bar?» dep kópke suraý salǵanda, jurtshylyq Móldirdi usyndy. Ádil baǵany kópten asyryp kim aıtady? Shákirtteriniń bilim dodasynda top jaryp júrgenin, muǵalimdikti jan-tánimen jaqsy kóretinin, keshe ǵana elimizde uıymdastyrylǵan «Úzdik ustaz-2022» baıqaýynda jeńimpaz dep tanylǵanyn tóńiregi ǵana emes, óńir jurty tegis biledi. О́ńirde emes, respýblıkada úzdik tanylý ekiniń birine buıyra bermeıtin baq. Bul Móldir Jaqsybaıqyzynyń jıyrma jylǵa jýyq muǵalimdik eńbeginiń nátıjesin kórsetken bir belesi ǵana. Alda áli talaı asý bar.
Móldir – pedagog-zertteýshi, pán olımpıadasynda respýblıkalyq júldeger júırigin baptaǵan ustaz. Esimi «Qaraǵandy oblysynyń bilim salasyndaǵy 100 jańa esim» qataryna engen.
«Bir qyzyǵy, men muǵalimdikke júrek qalaýymen kelsem de, eń alǵash aǵylshyn tiline qyzyqtym. Alaıda qazaq tili men ádebıeti páninen sabaq bergen muǵalimimniń nusqaýymen qazaq tili men ádebıeti páni mamandyǵyn tańdadym. Ustazym «Sen anańnan ustaz bolyp týǵansyń» degendi jıi aıtatyn. Rasynda, solaı eken. Ustazdyń kóregendigine tántimin. Al búgingi ustazǵa qoıylatyn talap pen ózimniń ustazdyq ǵumyryma qarap, jalpy osy kúni muǵalimdikke kezdeısoq kelgen mamandar joqtyń qasy dep bilemin», deıdi Móldir Jaqsybaıqyzy.
Ustazdyń qolynda ult bolashaǵynyń kilti turǵany barshaǵa málim. Ony kúnde jar salyp aıta bermesek te, kókirekte saırap jatqan dúnıe. Muǵalimdik mıssııaǵa adal bolý úshin qaıtpek kerek? Bul saýalǵa qatysty Móldirdiń óz fılosofııasy bar. Ol – «adamdyq mıssııaǵa adal bolýy kerek».
«Muǵalimdik mıssııaǵa adal bolý úshin aldymen adamdyq mıssııaǵa adal bolý kerek. Jaqsy adam bolmaı, jaqsy muǵalim de bola almaıtyn shyǵarmyz. Alash qaıratkeri Maǵjan Jumabaev: «Men shákirttiń shyraǵyn jaǵý úshin mekteptemin», degen eken. Eger ustaz ón boıyna oqýshyǵa degen, óz mamandyǵyna degen súıispenshilikti jınaqtasa, ol naǵyz ustaz bola alǵandyǵy. Rasymen, ustazdyqty sheksiz súıemin. Oǵan kúnine myń sebep tabylady. О́zimdi burynǵy muǵalim men qazirgi muǵalimniń ortasyndaǵy kópir ispetti sezinemin. Qazirgi jańashyldyqtyń bereri de kóp. Búgingi muǵalim sabaq berýdiń túrli tásilin meńgergen, ártúrli platformalardy qoldanyp, túrli ádis arqyly balanyń qyzyǵýshylyǵyn arttyra alatyn sheber adam. Biraq óz basym ádis qýalap, ózgeris jasaımyz dep ózegimiz talyp, ishki qundylyǵymyzdy, ózimizdiń taǵylymdy tárbıemizden ajyrap qalmasaq eken deımin. Ulttyq bolmysymyzdan alystamaı jańarýymyz kerek», deıdi Móldir.
Muǵalimniń pikirinshe, ustazdyń bedelin zań emes, ustazdyń ózi kóteredi. «Pedagog mártebesi týraly» zań muǵalimdik mamandyqqa suranysty arttyrǵan sııaqty. Oǵan búgingi bolashaq muǵalim – stýdentterdiń kóptigi dálel», deıdi ol.
QARAǴANDY
