Sýretterdi túsirgender Amanqul Dúısenbaev, Erkebulan ÚKIBAEV
Prezıdent ultymyzdyń dúnıetanymynda áıeldiń orny erekshe ekenin aıta kele, sulýlyq pen náziktik, meıirim men shapaǵat – bári de áıelderden bastaý alatynyn jetkizdi.
– Shyn máninde, árbir adam úshin anadan uly, anadan qymbat eshkim joq. Eń qasterli qundylyqtarymyz «Jer-Ana», «Otan-Ana» uǵymdarymen tyǵyz baılanysty. «Ata uldy, ana ultty tárbıeleıdi» deıdi. Bul sózdiń aıryqsha mán-mańyzy bar. Ult bolashaǵy urpaq tárbıesinen bastalady. Ár balanyń jetistigi – ana mahabbatynyń jemisi. Uly Abaı aıtqan «Tolyq adamǵa» tán asyl qasıetter urpaqtyń boıyna ana arqyly darıdy. Qazir elimiz damýdyń mańyzdy kezeńine qadam basty. Ádiletti Qazaqstandy qurý úshin aýqymdy reformalardy qolǵa aldyq. Eń bastysy, el ishinde otanshyldyq, memleketshildik rýh myqty bolýy kerek. Biz kók baıraǵymyzdy bıik ustaıtyn, bilimdi, ultjandy urpaq ósirýimiz kerek, – dedi Prezıdent.
Qasym-Jomart Toqaev «Jastarǵa salynǵan qarajat – eń utymdy ınvestısııa» ekenin jáne qoǵamdaǵy áıelderdiń róline erekshe toqtaldy.
– Qazir qyzdarymyz álemniń eń úzdik ýnıversıtetterinde bilim alyp jatyr. Jahandyq kompanııalarda jumys isteıdi. San túrli kásipti meńgergen áıelder qoǵamnyń túrli salasynda tabysty eńbek etip júr. Olardyń arasynda muǵalim, dáriger, memlekettik qyzmetshi, tárbıeshi, tiginshi jáne basqa da mamandyq ıeleri bar. Halyqaralyq jarystarda kók týymyzdy bıikke kótergen sportshy arýlarymyz da az emes. Qanshama qyz-kelinshekter bıznespen aınalysyp, myńdaǵan adamǵa jumys usynyp otyr. Men barshańyzdy maqtan etemin! Sizderge shynaıy rızashylyǵymdy bildiremin, – dedi Memleket basshysy.
Prezıdenttiń aıtýynsha, áıelder ádil, dana ári tapqyr basshy bola alatynyn ómirdiń ózi dáleldep otyr. Qazir shaǵyn jáne orta bıznestegi áıelderdiń úlesi 42 paıyzǵa jetti.
– Bul – áıelder kásipkerligine memleket tarapynan kórsetilgen júıeli qoldaýdyń nátıjesi. Byltyr óz kásibin ashqysy keletin 6 myńnan astam kópbalaly anaǵa arnaıy grant berildi. Aýyldaǵy qyz-kelinshekter bıznespen belsendi aınalysatyn boldy. Myńdaǵan áıel bıznes jobasyn júzege asyrýǵa memleketten sýbsıdııa alatyn bolady. Bul maqsatqa jalpy somasy 250 mıllıard teńge jumsaldy, – dedi Prezıdent.
Memleket basshysy óziniń tapsyrmasymen Otbasy jáne genderlik saıasat týraly Jańa tujyrymdama qabyldanǵanyn, atalǵan qujat áıelderdiń ózin-ózi damytýyna mol múmkindik berýge baǵyttalǵanyn atap ótip, árbir áıel otbasynda baqytty, qyzmette tabysty, qoǵamda belsendi bolýǵa laıyqty ekenin aıtty.
Saltanatty jıyn sońynda Memleket basshysy «Arýana» úzdik áıelder jobasy baıqaýynyń jeńimpazdaryn marapattady. Bul marapat ártúrli salada áleýmettik mańyzy bar jobalarmen aınalysyp, azamattyq qoǵamnyń damýyna eleýli úles qosyp júrgen isker áıelderge on nomınasııa boıynsha tabystaldy.
Halyqaralyq áıelder kúnine oraı ótkizilgen «Arýana» úzdik áıelder jobasy baıqaýy jeńimpazdarynyń qatarynda «Agrobıznes salasyndaǵy úzdik joba» atalymy boıynsha – Aıgúl Saǵymbekqyzy Aqshalova, «Úzdik IT joba» atalymy boıynsha – Farıda Amantaıqyzy Aqsholaqova, «Kreatıvti ındýstrııa salasyndaǵy úzdik joba» atalymy boıynsha – Sáýle Halelqyzy Salıhova, «Jańa medıa salasyndaǵy úzdik joba» atalymy boıynsha – Ásem Bolatjanqyzy Nurǵalıeva, «Áıelder men balalar quqyǵyn qorǵaý salasyndaǵy úzdik joba» atalymy boıynsha – Nesibeli Zarıvanqyzy Básenova, «Inklıýzıvti damý salasyndaǵy úzdik joba» atalymy boıynsha – Araılym Maǵashqyzy Álimjanova, «Ǵylym jáne ınnovasııa salasyndaǵy úzdik joba» atalymy boıynsha – Marına Vladımırovna Derkach, «Áıelder men balalardyń belsendi quqyq qorǵaýshysy» atalymy boıynsha – Lázzat Bekmuhanbetqyzy Rakısheva, «Kásiporynnyń úzdik áıel-basshysy» atalymy boıynsha – Fatıma Nabıdýllaqyzy Tóleeva, «Áıelder quqyqtaryn qorǵaý salasyndaǵy úzdik úkimettik emes uıym» atalymy boıynsha – Olga Vladımırovna Ryl bar.
