- Ulttyq taǵam túrlerin, onyń ishinde halqymyzdyń tátti taǵamdaryn naryq talaptaryna saı ázirlep kásip ashqan ekensiz. Demek Qostanaıda ulttyq ónimge degen suranys jaqsy bolyp turǵany ǵoı.
- Qostanaı jurtshylyǵyna men usynǵan zamanaýı túrdegi ónimder tańsyq bolady. Tutynýshylar bizdiń dúkenge kirgen kezde qol dıirmendi kórip, jenttiń dámin tatqanda bala kezderin eske túsirip jatady. Ájesi men anasynyń da osyndaı taǵamdar daıyndaǵan sátterin eske túsiredi... Sondyqtan kelýshiler barshylyq. Bul qaladaǵy ulttyq táttiler ázirleıtin alǵashqy dúken bolǵandyqtan da suranys bar.
- Jalpy bul kásipti qolǵa alý týraly oı qaıdan keldi?
- Áýelde, mundaı kásip ashý týraly oı bolmaǵan. Keıde bala-shaǵa úshin, endi birde qonaqtarǵa arnap jent sekildi jeńsik astar daıyndaıtynmyn. Al kásip bastaýyrma bıznes jarnamasynyń basty quraldarynyń biri áleýmettik jeli sebepshi boldy. О́ıtkeni men balalaryma ázirlegen jentti áleýmettik jelilerdegi paraqshalaryma júktedi. Sol sátten bastap tapsyrys túse bastady. Kórip otyrǵanyńyzdaı sońy saýdaǵa aınaldy
Kishkentaıymnan anamnyń janynda júrip, bıdaı qýyryp, ony qol dıirmeninen ótkizip, jent jasaýdy úırendim. Sút tartyp, qaımaq bylǵap, baýyrsaq pisirip, erte jastan úı sharýasyna aralasqan soń, ulttyq táttilerdi ázirleý esh qıyndyq týdyrmady. Sondyqtan kóptep tapsyrys túse bastaǵanda, kún-tún demeı birden bilek sybana kirisip kettim. Bul iste otbasym men jaqyndarymnyń qoldaýy zor boldy.
- Naryqta básekelestik bar ma?
- Búginde áleýmettik jeli arqyly ádemi dúnıeni jaryqqa shyǵaryp, kópke tanytýǵa múmkindik mol. Sondyqtan Qostanaıda bolmasa da qazaqstandyq naryqtaǵy ózge de ónimdermen salystyryp, óz ereksheligimdi kórsetýge tyrysamyn.
- Jumysyńyzdy qazirgiden de ilgeriletip, mol tabys tabý úshin qandaı da bir kedergiler bar ma?
- Qalamyzda shıkizat óte az. Tipti jenttiń qalyptaryn da tabý qıyn. О́zge qaladan aldyrtýǵa týra keledi. Qolda bar quraldarmen jumys istep júrmiz...
- О́nimdi qaı jerde ázirleısizder?
- Dúken jáne seh qatar jumys istep tur. Alla sátin salsa, sehty keńeıtý jospary tur.
- О́nimdi saýdaǵa shyǵararda sapasynan bólek taǵy ne nársege mán beresiz?
- Eń aldymen sapaǵa mán beremin. Kúndelikti daıyndalsa da, aldymen ózim dámin tatyp kóremin. Sodan keıin baryp sórege qoıamyn. Odan keıin qaptamasynyń sándi bezendirilýine de zer salamyn. Kóp tutynýshylar ulttyq ónimdi osylaı ádemi usynǵanyma qýanady, tań qalady.
- Ulttyq taǵamnyń birin ázirleýge jumsalatyn shyǵyn kólemi men odan túsetin tabys kólemi jaıly aıtyp bere alasyz ba?
- Ázirge qupııa bolsyn. Sebebi, dúken retinde ashylǵanyna endi ǵana 6 aı bolady.
- О́nimderińizdi ózge ult ókilderi de satyp alatyn shyǵar?
- Árıne, tutynýshy ultqa bólinbeıdi ǵoı. Bizge kelgen keı ózge ult ókilderi osy taǵamdarmen baılanysty túrli oqıǵalaryn, tarıhı sátterin de aıtyp bergen edi. Tipti keı ónim túrlerin ózderi úılerinde daıyndaýǵa kóshken basqa ult ókilderin de bilemin. Bizdiń ónim keıde syı retinde Qazaqstannan ózge memleketterge de joldanyp jatady.
- Kásibińizden otbasyńyzǵa oıyssaq...
- Úsh balanyń anasymyn. A.Baıtursynov atyndaǵy Qostanaı óńirlik ýnıversıtetiniń aǵa oqytýshysymyn. Qazir bala kútimine baılanysty demalystamyn.
- Qyz-kelinshekter merekesi kele jatyr. Kimnen jáne qandaı syı kútesiz?
- Barlyq ana, áje, apa, jeńge, sińililerimdi merekemen quttyqtaımyn. Kóktemdeı qulpyryp, aınalaǵa shýaq shasha berińizder! Eshkimnen syı kútpeımin, negizi. Kóńildiń ózi syı dep bilemin.
