Atap aıtqanda, Úkimet basshysy jolaýshylar, júk jáne mamandandyrylǵan tehnıka shyǵaratyn «Hyundai Trans Auto» JShS zaýytyna bardy. Kásiporyn 2011 jyly «Hyundai Motor Company» kompanııasymen (Ońtústik Koreıa) yntymaqtastyq týraly memorandým aıasynda iske qosyldy.
Búgingi tańda zaýyt respýblıkanyń jeke menshik kompanııalaryna, kommýnaldyq uıymdaryna jáne memlekettik organdaryna Hyundai, Golden Dragon jáne Foton kólik quraldarynyń keń jelisin (reanımobılder, órt sóndirý mashınalary, qoqys tasıtyn kólikter, sý tasıtyn kólikter, evakýatorlar, júk kólikteri) jetkizedi. Aldaǵy birneshe jylda kásiporyn basshylyǵy óndiristi keńeıtýdi, jańa jumys oryndaryn ashyp, eksportty ulǵaıtýdy jáne lokalızasııalaý úlesin arttyrýdy josparlap otyr.
Sonymen qatar «Astana Grýpp» holdınginiń prezıdenti Nurlan Smaǵulov Premer-mınıstrdiń nazaryn birqatar problemalyq máselege aýdardy. Atap aıtqanda, ónim eksporty, Qytaıdan Qazaqstanǵa júk tasymaldaý jáne óndirýshilerge kádege jaratý alymy boıynsha bereshekti tóleý máseleleri qozǵaldy.
Álıhan Smaıylov Úkimet el ekonomıkasyn odan ári ártaraptandyrýdy qoldaıtynyn jáne bul zaýyt osy jumystyń bir mysaly ekenin atap ótti.
«12 jyl ishinde kásiporyn naryqtaǵy óz pozısııasyn edáýir nyǵaıtty. Biz kompanııanyń ónim jelisine ınvestısııa salý jáne ony keńeıtý josparlaryn quptaımyz. Memleket basshysy qala ákimdiginiń aldyna halyqtyń júrip-turýyna yńǵaıly kólikpen qamtamasyz etip, ekologııaǵa tıgizetin zardaptardy azaıtý mindetin qoıdy. Sondyqtan bul óndiris tek qala úshin ǵana emes, búkil respýblıka úshin de zor mańyzǵa ıe», dedi Premer-mınıstr.
Sondaı-aq Úkimet basshysy kóterilgen máselelerdiń sheshimin tabýǵa járdemdesetinin aıtty.
Qazirgi ýaqytta Oqý-aǵartý jáne Densaýlyq saqtaý mınıstrlikteriniń tapsyrysy boıynsha «Hyundai Trans Auto» JShS zaýytynda Golden Dragon markasynyń mektep avtobýstary jáne Hyundai (H-1, H350) shaǵyn avtobýsy bazasynda jedel járdem kólikteri qurastyrylyp jatyr. Atap aıtqanda, «Mektep avtobýsy» pılottyq jobasy aıasynda Almaty ákimdigi mektepke oqýshylardy tasymaldaý úshin 100 jańa tehnıka satyp alýdy josparlap otyr. Barlyǵy 29 mektepte bilim alatyn 7,7 myń oqýshyǵa jaǵdaı jasaý kózdelgen. Atalǵan avtobýstar zamanaýı qaýipsizdik quraldarymen jabdyqtalǵan. Búgingi tańda árbir mektep boıynsha egjeı-tegjeıli marshrýttar belgilenip, sonymen qatar balalardy otyrǵyzý jáne túsirý úshin kóliktiń kelý ýaqyty kórsetiletin arnaıy aıaldamalar daıyndalyp jatyr.
Premer-mınıstr bilim berý sapasyn arttyrýdyń basty faktorlarynyń biri árbir oqýshynyń qajettilikterine baǵdarlanǵan jáne onyń qaýipsizdigin qamtamasyz etetin jaıly mektep ortasy ekenin atap ótti. Sondyqtan «Mektep avtobýsy» pılottyq jobasy – osyndaı iri megapolıstegi máseleniń durys jáne ýaqytyly sheshimi.
Almaty ákiminiń orynbasary Álisher Ábdiqadyrov atap ótkendeı, sońǵy jyldary qalanyń avtokólik jasaý klasteri jaqsy qarqynmen damyp keledi: 2022 jyly óńdeý ónerkásibiniń 70%-y avtokólik jasaý esebinen qamtamasyz etildi (37,2 myń avtokólik óndirildi).
Bul rette ótken jyldyń qarasha aıynda Memleket basshysy qytaılyq Changan, Chery jáne Haval brendteriniń jańa avtokólik zaýytynyń qurylysyn iske qosty, ol 2025 jyly paıdalanýǵa beriledi dep josparlanyp jatyr. Sonymen qatar atalǵan kezeńde avtokólik komponentteri men quramdas bólikterin óndirý boıynsha taǵy tórt jobany iske qosý kózdelgen. Jalpy 2026 jylǵa qaraı qalada jylyna 150 myńǵa deıin avtokólik shyǵarý josparlanyp otyr, bul rette 3 myńǵa jýyq ónimdiligi joǵary jumys orny ashylmaq.
Budan ári Úkimet basshysy «Valtherm» JShS joǵary qysymmen quıý ádisin qoldanatyn Qazaqstandaǵy alǵashqy alıýmınıı jáne bımetall jylý radıatorlaryn shyǵaratyn zaýyt qurylysynyń barysymen tanysty. Jobaǵa salynǵan jalpy ınvestısııalar – shamamen 15 mlrd teńge.
Zaýyt ónimi beriktigi men jylý berý boıynsha Qytaıda shyǵarylyp, Qazaqstanǵa ákelinetin balamaly radıatorlardan 40-50%-ǵa asyp túsedi dep kútiledi. Kompanııa 430 jańa jumys ornyn ashýdy, otandyq qurylys kompanııalarynyń suranysyn ishinara qamtamasyz etýdi jáne kórshi elderge tasymaldaýdy jolǵa qoıýdy josparlap otyr. Birinshi kezeńde kásiporynnyń óndiristik qýaty jylyna 7,2 mln radıator bolsa, al tolyq qýatyna shyqqannan keıin kórsetkish 15 mln-nan aspaq. Bıylǵy shildede quıma óndirisin iske qosý kózdelgen.
Álıhan Smaıylov qala ákimdigi qaıta óńdeý deńgeıi joǵary osyndaı ımportty almastyratyn óndiristerdi damytýǵa erekshe nazar aýdarýy qajet ekenin atap ótti. Atap aıtqanda, atalǵan zaýytty iske qosý Qazaqstannyń basqa elderden radıatorlar jetkizýge táýeldiligin tómendetýge eleýli úles qosady.
Bul rette Úkimet basshysy osy baǵytty qoldaý úshin elden alıýmınıı synyqtaryn baqylaýsyz shyǵarýdyń jolyn kesý jáne sýmen jylytý quraldaryna mindetti sertıfıkattaýdy engizý jónindegi sharalar pysyqtalatynyn aıtty.
Jalpy, Premer-mınıstrdiń aıtýynsha, Almatynyń ındýstrııalyq aımaǵy otandyq jáne sheteldik ınvestorlar úshin tartymdy sanalady. Osyǵan baılanysty memleket onyń damýyna belsendi túrde járdem kórsetýdi jalǵastyrmaq. Búgingi tańda qala ákimdigi onyń aýmaǵyn 194 gektarǵa keńeıtýdi kózdegen. 2023 jyldyń sońyna deıin munda qajetti ınfraqurylymnyń barlyǵyn qurý josparlanyp otyr: temirjol, ınjenerlik jeliler jáne t. b. salynady.
«О́tken jyly respýblıka boıynsha biz 150-den astam ındýstrııalyq jobany iske asyrdyq, bul $2 mlrd-qa ımportty almastyrýǵa qol jetkizýge múmkindik berdi. Bıyl mundaı jobalardyń sanyn 170-ke deıin arttyrý josparlanyp otyr. Bul $2,9 mlrd-qa ımporttyń ornyn aýystyrýǵa múmkindik beredi», dedi Álıhan Smaıylov.
Sonymen qatar Premer-mınıstr shaǵyn ónerkásip parkteri men qalanyń ındýstrııalyq aımaǵy turǵyndarymen kezdesti, onda Úkimet basshysyna bólmearalyq esikter shyǵaratyn zaýyttyń jumysy, zamanaýı ǵylymı-óndiristik jylyjaı kesheniniń qurylysy, sondaı-aq tamshylatyp sýarý júıelerin qurý, kondıterlik ónimder men qaǵaz qaptamalaryn shyǵarý jónindegi jobalar týraly aıtyldy.
