Erıslandıdiń jasy 40-qa taıap qaldy. Ol 1983 jyldyń 11 sáýirinde Kýbanyń Gýantanamo qalasynda dúnıege keldi. Áýeli áýesqoılar arasynda óte jaqsy kórsetkishterge qol jetkizdi. Atap aıtsaq, 2005 jyly Qytaıdyń Mınıan qalasynda 69 kılo salmaq dárejesinde judyryqtasyp, álem chempıony atandy. Sol jarys barysynda Lara ýkraınalyq Sergeı Derevıanchenko (30:9), úndistandyq Vıjender Sıngh (taza jeńis), Andreı Balanov (28:16), amerıkalyq Melson Boıd (taza jeńis), qazaq Baqtııar Artaev (31:22) jáne belorýssııalyq Magomed Nýrıddınov (24:9) syndy dúldúlderdi esh kúmánsiz jeńdi.
2005 jyly Máskeýde ótken Álem kýboginde Kýba quramasy ekinshi oryndy ıelengeni belgili. Sol komandanyń sapynda Erıslandı Lara da óner kórsetti. Bostandyq aralynyń ókilderi jartylaı fınalda Qazaqstannyń boksshylarynan basym tústi. Sol kezde Lara Baqyt Sársekbaevty (39:22) san soqtyrǵan edi. Keıinnen ol Ortalyq Amerıka oıyndary jáne basqa da asa iri halyqaralyq týrnırlerde jeńis tuǵyryna kóterildi. Sóz oraıy kelgende, túrli baıraqty básekelerde kýbalyq boksshy bizdiń Baqtııar men Baqyttan bir emes birneshe márte jeńilgenin de aıta ketken abzal.
2007 jyly Brazılııada alaýy tutanǵan Panamerıka oıyndary kezinde Erıslandı óziniń dańqty otandasy, Olımpııa oıyndary men álem chempıonattaryn eki retten utqan Gılermo Rıgondomen birge AQSh-qa qashýǵa áreket etedi. Biraq olar jergilikti polısııanyń qolyna túsip, Kýbaǵa qaıtaryldy. Kelesi jyly atalǵan boksshy qaıta táýekelge bel býdy. Bul joly Laranyń joly boldy. Birer ýaqyt Germanııada turaqtaıdy da, kóp keshikpeı Amerıkaǵa attanady.
AQSh-qa jetkennen keıin kásipqoı rıngte kúsh synasa bastaıdy. 2008-2022 jyldar aralyǵynda barlyǵy 35 kezdesý ótkizgen Erıslandı 29 ret jeńis toıyn toılady. 16 básekede aıqyn basymdyq tanytty. Ol tek Pol Ýılıams (2011 jyly), Saýl Alvares (2014 jyly) jáne Djarrett Herdten (2018 jyly) ǵana upaı sanymen utyldy. Taǵy úsh tartysta teń esep tirkeldi. Ár kezderi Lara túrli beldi nusqalar boıynsha altyn belbeýdi ıelendi. Qazirgi kezde WBA-nyń turaqty chempıony. О́ziniń sońǵy jekpe-jegin Erıslandı Lara byltyrǵy jyldyń mamyr aıynda ırlandııalyq Gerı O’Sallıvanǵa qarsy ótkizip, ony segizinshi raýndta uryp jyqty.
Al Jánibektiń júrip ótken joly jankúıerlerdiń kóz aldynda. Ol da áýesqoı rıngte tolaǵaı tabysqa jetti. Álem jáne qurlyq chempıony, Azııa oıyndarynyń jeńimpazy atandy. Kásipqoılar arasynda 13 kezdesý ótkizip, barlyǵyn jeńispen aıaqtady. Segiz qarsylasyn nokaýtqa jiberedi. Bul kúnderi WBO nusqasynyń altyn belbeýin ıelenip otyrǵan qazaqtyń qaısar uly endi orta salmaqtyń absolıýtti chempıony atanýdy kózdeýde.
