Mysaly, 11 sáýirde Jangeldın aýdanyndaǵy Aqkól aýylyna aparatyn kúre joldyń ústimen qyzyl sý júrip, áleýmettik jelide «Joldy qarǵyn sý jyryp ketti» degen habar taraǵan. Shalǵaı jatqan eki aýylǵa aparatyn jalǵyz joldyń jaǵdaıyn bilmekke aýdan ákimi Shota Ospanovqa habarlastyq.
– Aqkól men Ahmet aýylyna baratyn joldyń byltyr jóndeý júrgizilmegen oıpańdaý bóliginiń tórt jerinen qyzyl sý asyp ketkeni ras. Jalpy joldyń asfalt tóselmegen jerleri sazǵa aınalyp, máshınelerdi júrgizbeı jatyr. Biraq erigen qardyń sýy joldy jyryp kete alǵan joq. Joldyń bir jaǵynan ekinshi jaǵyna qaraı asyp quıylýda. 12 sáýirde osy tórt ýchaskeniń eki jaǵyn bıiktep, qyzyl sýdy toqtattyq. Byltyr Ahmet Baıtursynulynyń 150 jyldyǵyna oraı bastalǵan bul joldyń qurylysy áli de jalǵasady. Bıyl Ahmet aýylynan beri qaraı otyz shaqyrymdaı jolǵa qıyrshyqtas tóseledi. Kelesi jyly onyń ústine asfalt júrgizemiz. Qazir kebir qujattarǵa ózgerister engizip jatyrmyz. Qarajaty bar. Aldaǵy bir-eki kún ishinde memlekettik satyp alý konkýrsyn jarııalaımyz, dedi Shota Ospanov.
Aýdan ákiminiń aıtýynsha, Torǵaı óńirinde byltyr kúzde jaýyn-shashyn kóp bolyp, jańbyrdyń sýy sol kúıi jerge sińbeı muz bolyp qatyp qalǵan. Jerge baılanǵan toń da qalyń, bir metrge deıin jetedi. Qazir keıbir eldi mekenderde sol sýdy sorǵytý jumystary júrip jatyr. Qutqarýshylar osydan bir-eki kún buryn Túıemoınaq, Shegen aýyldarynda qurǵatý jumystaryn atqarǵan. Olarǵa oblys ortalyǵynan arnaıy tehnıkalary bar 18 adam kómekke kelipti. Jangeldın aýdanyna Ulytaý jaqtan keletin tasqyn sýdyń aldy sáýirde ǵana jetetindikten, ózen-kólderge jaqyn ornalasqan aýyldarǵa, qazirshe, eshqandaı qaýip tónip turǵan joq. Sondyqtan qutqarýshylar qazir erigen qar sýynyń aldyn tosýǵa kúsh salyp jatyr.
Arqalyq, Amangeldi, Jankeldın, Naýryzym, Áýlıekól jáne Qarasý aýdandarynda qar erı bastady. Bul aýdandardaǵy 37 eldi meken, ıaǵnı 808 turǵyn úı qyrdan keletin qyzyl sýdyń astynda qalýy yqtımal. Qazir bul óńirlerde uzyn sany 12 myń adamǵa jetetin 253 evakýasııalyq oryn daıyndalǵan. Qutqarýshylar qazirden bastap ózen-kólderdiń deńgeıin baqylaýǵa kirisip jatyr. Sýdyń óz arnasymen erkin aǵýyn qamtamasyz etý úshin bıyl sý aıdyndarynda 51 myń tekshe metr muz jarylady.
– Torǵaı óńirinde eldi mekenderdiń birazy ózenge jaqyn ornalasqan.
Mundaı aýyldar Tobyl ózeniniń boıynda da kóp. Osyndaı qaýipti ózen arnalarynda jarý jumystary júredi. Konkýrstyq jumystar men ǵaryshtan baqylaý júrgizýge 91 mln teńge qarjy qarastyrylǵan. Jalpy sany 90 eldi meken enetin birneshe aýdanda qutqarýshylar jeke quramy kúsheıtilgen rejimdegi jumys tártibine kóshti, deıdi oblystyq TJD basqarma basshysynyń orynbasary Aslan Mahmutov.
Taıaýda ǵana respýblıkalyq «Kóktem-2023» oqý-jattyǵý sharalary aıasynda óńirdegi qutqarý qyzmetteriniń, qala jáne aýdan ákimdikteriniń aldaǵy sý tasqynyna daıyndyǵy pysyqtaldy. Sharanyń basty maqsaty – azamattyq qorǵanys kúshteri men tehnıka quraldaryn qar erimeı turyp taǵy bir synaqtan ótkizip alý.
Naýryzdyń besinde Qostanaı qalasynyń irgesindegi Drýjba eldi mekeni men Tobyl qalasynyń mańyna shoǵyrlanǵan qutqarý kúshteri eki kún boıy tasqynǵa tosqaýyl bolatyn jattyǵýlar jasap, tehnıkalyq múmkindikterin tekserip kórdi. Sondaı-aq, eldi mekenderge jaqyn jat-qan aryqtardy, sý ótkelderi men qubyrlardy tazalaý, qar shyǵarý jumystary júrgizildi.
Mamandar bıyl Reseıden keletin sý jyldaǵy mólsherden az bolady dep otyr. Degenmen, qar az dep qol qýsyryp otyrýǵa taǵy bolmaıdy. Tabıǵat tosyn minez tanytyp qalǵan jaǵdaıda, qyzyl sýdan keletin qaýiptiń aldyn alýǵa daıyn otyrǵan abzal. Qutqarýshynyń tehnıkasy saıly, kerek-jaraǵy daıyn bolýy shart. Jalpy, oblysta aldaǵy tasqynǵa qarsy sharalarǵa 2,2 mlrd teńge bólingen. Qarǵyn sýdan qaýip naýryz aıynyń sońy men sáýir aıynyń ortasynda kúsheıedi degen boljam bar.
Qostanaı oblysy
