Joǵaryda atalǵan jospardyń negizinde 30 myńnan astam adamdy «2021-2025 jyldarǵa arnalǵan kásipkerlikti damytý jónindegi ulttyq jobasy» aıasynda bıyl jumysqa ornalastyrý kózdelip otyr. Halyqtyń ál-aýqaty artsa, bul – álbette birinshi kezekte turaqty jumys ornynan tapqan tabysynyń nátıjesi. Al áleýmettik jaǵdaıdyń jaqsarýyna yqpal etetin faktor árqashan ulttyq ekonomıkanyń oń dınamıkasy bolyp qala beredi.
Aıtqandaı, sol «eki qolǵa – bir kúrek» izdegen 57 181 azamattyń 42 714-i turaqty, 6 617-si ýaqytsha jumys oryndaryna ornalastyrylady. Budan bólek, óńirlerde «Jumys berýshilerdiń suratýy boıynsha oqý uıymdarynda jumyssyzdardy kásiptik oqytýdy uıymdastyrý» baǵdarlamasy júzege asyp keledi. Bıyl osy atalǵan baǵdarlama aıasynda turaqty jumysqa ilige almaı júrgen 1 671 kisini kásiptik mamandyqqa oqytý josparlanyp otyr.
Al Shymkent qalalyq jumyspen qamtý jáne áleýmettik qorǵaý basqarmasy basshysynyń orynbasary Maqsat Joldasbekovtiń málimdeýinshe, eńbek naryǵynda suranysqa ıe kásiptik mamandyqtarǵa oqytý basqarmanyń mańyzdy qadamdarynyń birine kiredi. Osy bastamanyń aıasynda ótken jyly qalanyń 2 400 turǵyny qysqa merzimdi oqý kýrstarynan ótipti. Bul ıgi is-sharanyń kózdegen basty maqsaty elimizde jumyssyzdar sanyn azaıtý bolyp otyr. Sonymen birge búgingi tańda qoǵamnyń ózekti problemasyna aınalǵan kásiporyndardaǵy kadr tapshylyǵy máselesin túbegeıli sheshýge septigin tıgizbek.
Taǵy bir mańyzdy jańalyqtyń biri – bıyldan bastap «Otbasynyń sıfrlyq kartasy» ulttyq jobasy iske qosyldy. Budan bylaı turǵyndarǵa áleýmettik hal-ahýalyna qaraı memlekettik qyzmetterdi usyný SMS habarlamalar arqyly iske asady. Aıtalyq jańa júıege sáıkes ataýly áleýmettik kómek alýshylardyń halyqty jumyspen qamtý ortalyǵyna qujat tapsyryp áýre bolmaıdy. О́ıtkeni uıaly telefonǵa kelip túsken SMS habarlamaǵa joldanǵan jaýap jetkilikti. Sonyń kómegimen AÁK alýshynyń ótinimi qabyldanyp, arnaıy komıssııanyń tekserýine jiberiledi. Ári qaraı komıssııa sheshimimen járdemaqy taǵaıyndalady.
