15 naýryzda elordalyq kásipkerler máseleniń anyq-qanyǵyn bilý úshin Astanadaǵy kompanııa qoımasynyń janyna jınaldy. Olardyń aıtýynsha, saıttyń tehnıkalyq qoldaýy ótinishterge jaýap bermeı tur.
«Wildberries ókilderiniń aıtýynsha, barlyq taýar basqa qoımaǵa jóneltilgen. Basqa qandaı qoıma? Bizde ol jalǵyz. Eshkim eshteńe bilmeıdi. Bireýge 20 myń, bireýge mıllıon, bireýge 14 mıllıon aıyppul keldi. 25 paıyz alyp qana qoımaı, aıyppuldy da tóleýimiz kerek pe?!», dedi kásipker Marına Goncharenko.
Aıta ketsek, atalmysh kompanııanyń Qazaqstandaǵy resmı ókildigi joq. Zańger Shyńǵys Temir kompanııanyń qyzmetkerimen baılanysyp, jaǵdaıdy túsindirýge tyrysty.
«Qoımany tańdaý kezinde júıe Nur-Sultan qoımasyn avtomatty túrde tańdaǵan, negizi Astana qoımasyn tańdaý qajet bolǵan. Bul - tehnıkalyq másele. Endi marketpleıs osy esepteýlerdi qaıta qaraýǵa daıyn ekendigi týraly aqparat kelip túsip jatyr. Alaıda «mereke qarsańy», «merekeden keıin» dep júrip, aqsha qaıtarylmaýy da múmkin», dedi zańger.
Saýda jáne ıntegrasııa mınıstrligi otandyq kásipkerlerge kómektese almaıtyndaryp aıtyp, aıyppuldarǵa qatysty sotqa júginýge keńes berdi.
«Keıbir zańnamalyq aktilerge elektrondyq saýda sheńberinde tutynýshylardyń quqyqtaryn qorǵaý, sondaı-aq Qazaqstan Respýblıkasynyń aýmaǵynda qoldanylatyn saýda alańdarynyń qyzmetin retteý bóliginde ózgerister, tolyqtyrýlar engizý boıynsha jumystar júrgizilip jatyr. Osynyń aıasynda marketpleıster josyqsyz tájirıbelerdiń táýekelderin joıý boıynsha tıisti sharalar qabyldaıdy», dep túsindirdi MTI sıfrlandyrý departamenti dırektorynyń orynbasary Rýslan Orazalıev.
Onyń aıtýynsha, bul túzetýler qoǵamdyq talqylaýlardan ótti jáne jaqyn arada Úkimettiń qaraýyna jiberiledi.
