Jańaózende 38 saılaý ýchaskesi jumys istep tur. O.Turmaǵanbetuly atyndaǵy «Mańǵystaý ındýstrııaldy tehnıkalyq» kolledjinde ornalasqan №79 saılaý ýchaskesinde jas kásipker Asylanbek Dosan eń birinshi bolyp óz tańdaýyn jasady. Saılaýǵa belsendi túrde qatysyp, daýys berý ár qazaqstandyqtyń azamattyq boryshy dep esepteıtin kásipker saılaý mańyzdy qadamdardyń biri deıdi.
«Qalamyzdyń damýy barysynda máslıhat depýtattaryn saılaý, odan ári elimizdiń damýy úshin zań jobalaryn usynýshy, daıyndaýshy Parlamenttiń Májilis depýtattaryn saılaý elimiz úshin asa mańyzdy dúnıe dep bilemin. Bul saılanýshy depýtattar qarapaıym halyqtyń únin tyńdaıtyn, solarmen sanasatyn, osy halyqty bılikpen baılanystyrýshy «zveno» bolýy qajet. Sondyqtan da kandıdattar ózderine qandaı aýyr júk túsetinin biledi jáne soǵan daıyn dep oılaımyn. Olarǵa sáttilik, kúsh jiger, shydamdylyq pen adaldyq tileımin», dedi A.Dosan.
