Aqmolalyqtardyń belsendiligi joǵary

Tańǵy saǵat onǵa deıin saılaýshylardyń 15,1 paıyzy daýys berip úlgerdi. Belsendilik birshama joǵary. Bul kezde oblystar arasynda ekinshi mejede boldy. Oblys ortalyǵy men shalǵaıdaǵy shaǵyn aýyldarda belsendilik joǵary. Aıtalyq, Birjan sal aýdanyndaǵy 31 saılaý ýchaskesinde 9465 saılaýshy tirkelgen bolsa, saǵat onǵa deıin 3124 adam óz tańdaýyn jasap úlgerdi.

«Saılaýshylardyń belsendiligi birshama joǵary. Senbi – demalys kúni bolǵandyqtan asyqpaı kelip jatqandar da bar. Saıası partııalar men qoǵamdyq birlestikterdiń baıqaýshylary saılaý barysyn qadaǵalap otyr», deıdi aýdandyq ishki saıasat bóliminiń jetekshisi Mirgúl Aıaǵanova.

El azamattarynyń óz saılaý ýchaskelerine baryp, daýys berýlerine barlyq jaǵdaı jasalǵan. Naqtyraq aıtsaq, qalalyq jáne aýdandyq avtobýs baǵyttary óńirdiń barlyq eldimekenderin qamtıdy. Tipti, Astana qalasynyń mańyndaǵy eldimekenderde jol júrý tegin.

Qııandaǵy Qorǵaljyn aýdanynda da aımaq turǵyndary saıası belsendilik tanytyp jatyr. Bul aýdanda uıymdastyrylǵan 17 saılaý ýchaskesine 5216 saılaýshy tirkelgen. Qorǵaljyn aýdandyq máslıhatyna 28 úmitker bar. Saılaý barysyn «Amanat» partııasy men «Daýys» qoǵamdyq baıqaýshylary koalısııasy baqylaýda. Bul aýdanda saǵat 11-ge deıin saılaýshylardyń 1176-sy nemese 22,5 paıyzy daýys berip úlgerdi.

Oblys ortalyǵynda da saıası naýqan barysynda jalpaq jurttyń el erteńine zor senimmen qaraıtynyn ańǵarýǵa bolady. Aqmola oblystyq saılaý komıssııasynyń tóraǵasy Manarbek Sádýovtyń málimdeýinshe, saǵat 12-ge deıin óńirdegi 517714 saılaýshynyń 33,63 paıyzy daýys berip úlgergen.