Aıagóz qalasynda turatyn egiz qyz – Aıdana men Gúldana alǵash ret daýys berse, tyl ardageri Kúlpash Jaqypqyzy da saıası naýqannan tys qalmaı, balalarynyń kómegimen óz tańdaýyn jasady. 1924 jyly burynǵy Abyraly aýdanynda dúnıege kelgen qarııa «Eńbek Eri» sekildi joǵary marapattardyń ıegeri.
– Elimizde saılaý bolyp jatyr degendi estip otyrmyn. Elimizde bereke-birlik bolsyn, soǵys bolmasyn! – dep júrekjardy lebizin bildirdi Kúlpash Jaqypqyzy.
О́zge óńirdegideı Abaı oblysynda da saılaýshylarǵa merekelik naýryzkóje men baýyrsaq usynyldy. Ýchaskege erte kelgen saılaýshylarǵa kádesyılar taratyldy.
– Bul saılaýdy halqymyz kópten beri kútti. Sol úshin de búgin qýana-qýana keldik. 18 jasqa tolǵan ár azamat óziniń konstıtýsııalyq quqyǵyn paıdalana otyryp, saılaýǵa atsalysýǵa tıis, – dedi Semeı qalalyq qoǵamdyq keńesiniń tóraǵasy Shaǵan Jumaqsanov.
Osy kúngi eleýli oqıǵalardyń taǵy biri saılaý ýchaskesinde semeılik jigit súıiktisine turmysqa shyǵý jóninde usynys jasady. Olar bolashaqta shańyraqtarynda ul týsa, esimin Saılaýbek qoıamyz dep yrymdady. 19 naýryz kúni Abaı oblysynda 18 sábı dúnıege kelse, onyń 12-si – qyz, altaýy – ul. Bile bilsek, búgingi urpaqtyń erteńi jarqyn bolýy úshin árkim saılaýǵa baryp, óz tańdaýlaryn jasaý kerek.
Abaı oblysy
