Mádenı-oıyn-saýyq baǵdarlamasy «Naz» bı ujymynyń, «Art Dombyra» mýzykalyq ujymynyń, «Qorqyt» etnoansambliniń, «Arna» jáne «Roıal» kvartetteriniń, «Shabyt» dombyrashylar ansambliniń jáne basqa da ártisterdiń ónerlerin qamtıdy. Sondaı-aq «Qara jorǵa» bı fleshmoby uıymdastyrylady. Qonaqtardy batyrlar men búrkitshiler, al balalardy anımatorlar qarsy alady.
Ulttyq oıyndar: asyq atý, arqan tartý, sondaı-aq sporttyq jarystar – fýtbol frıstaıly, sadaq atý jáne álemniń tórt dúrkin rekordshysy, Gınness kitabynyń rekordshysy jáne Qazaqstannyń alty dúrkin rekordshysy Sergeı Syrýlnıkovtyń qatysýymen kúsh ızometrııasy ótkiziledi.
Budan bólek Bolashaq energııasy murajaıynda etnoansamblderdiń, bı ujymdarynyń jáne «Naýryz» mıýzıklin oryndaıtyn teatr trýppasynyń qoıylymdary josparlanǵan. Sondaı-aq kelýshilerge naýryz kóje men baýyrsaq taratylady. 21-23 naýryz aralyǵynda murajaıǵa kirý tegin bolady.
EXPO halyqaralyq kórme ortalyǵynda 21-23 naýryz aralyǵynda ótetin Shyǵys bazary uıymdastyrylady. Munda da aýqymdy merekelik baǵdarlama ótkiziledi. Qonaqtardy kópes, batyr, búrkitshi jáne han sııaqty keıipkerler qarsy alady. Saýda dúkenderi shyǵys stılinde bezendirilip, onda saýdagerler otandyq óndirýshilerdiń taýarlaryn satady, al qolónershiler men sheberler óz qoldarymen jasalǵan buıymdaryn usynady.
