Qazaq estradasyndaǵy jas ánshiniń biri Ernar Aıdar oryndaıtyn «Kúnim, sen sónbeshi!» deıtin án bar. Osy ánge klıp túsirilgen. Sol klıptiń bas keıipkerleri – atyraýlyq Marlen men Ánel. Ánshiniń olardy tańdaýy tegin emes.
О́ıtkeni eki jastyń mahabbat hıkaıasy áleýmettik jeli arqyly jurtshylyqqa keńinen taraǵan. Sol sebepten bul klıpti qazaq qoǵamy jyly qabyldady. Oǵan aldymen Jylyoı aýdanynyń ortalyǵy – Qulsary qalasynyń turǵyny Marlen Nurǵasenovtiń aýyr dertke shaldyqqan ǵashyǵyn qoldap, onyń ottegi ballonyn kóterip júrgeni áser etkeni daýsyz. Dana Abaıdyń «Mahabbatsyz dúnıe bos» degenindeı, jas jigittiń ǵashyǵyna degen kirshiksiz sezimi, qınalǵan sáttegi janashyrlyǵy júrek tebirentedi.
Jas jigitttiń júregin baýraǵan súıiktisi Ánel Muratova 2009 jyly aýyr dertke shaldyqqan. Biraq qaısar boıjetken Marlenniń qoldaýymen qıyndyqqa qarsy turyp, ómir súrýden úmitin úzgen joq. Dertinen aıyǵý úshin aldymen Aqtóbedegi, odan soń aıshylyq bolmaǵanymen, birneshe kún jol júrerlikteı alystaǵy Almaty men Qaraǵandy qalalaryndaǵy bilikti dárigerlerdiń keńesimen jeti jylǵa jýyq emdeldi. Tipti bir ókpesin aldyryp, ottegi ballonymen júrýine týra keldi. Bir kúnde 20-ǵa jýyq dári-dármek qabyldaǵan onyń asqazany men júregi syr berip, tynys alýyn, aǵzasyn odan saıyn álsiretti.
О́zge elden kelgen professordyń «Áneldiń ómir súrý múmkindigi 30 paıyz. Sondyqtan oǵan kúrdeli operasııany jasaýdy eshkim jaýapkershiligine almaıdy» degeni boıjetkenniń júregine shanshýdaı qadalsa da moıyǵan joq. Kerisinshe, ómir úshin, bolashaǵy úshin kúresip, shar qaıraqtaı shıryqty. О́ıtkeni onyń qasynda aýrýhanada birge túnep, syrqaty janyna batqan sátte sózimen de, isimen de qoldaý bildirgen Marlen bar. Onyń bul áreketi boıjetkenniń erik-jigerin janydy. Aýyr syrqatynan aıyǵýǵa úmit otyn úrleı tústi.
Bir-birine sengen jup 2015 jyly otbasyn quryp, nekesin Qaraǵandy qalasynda qıdyrǵan. Sodan beri Áneldiń jaǵdaıy jaqsardy. Olar jaqynda sábıli bolyp, ómirge kelgen ulǵa Dinmuhammed esimin berdi.
«Allanyń qudiretinde shek joq qoı. Bizdi áke, ana atanady dep kim oılaǵan? Endi mine, Allanyń qalaýymen áke, ana baqytyn sezindik. Kóp jyl kútken balapanymyz aman-esen dúnıege kelip, ómirimizdi 360 gradýsqa ózgertti», dep jazdy Ánel áleýmettik jelidegi paraqshasynda.
Erge tán erlikke para-par is qazaq qyzynyń da qolynan keledi. Sonyń mysalyndaı, jol apatynan keıin arbaǵa tańylýǵa májbúr bolǵan Dáýren Járdemovke qoldaý bildirgen Dilnaz Dáýletbaevanyń janashyrlyǵy jurtshylyqtyń yqylasyna bólendi. Ákesin jumysqa alyp bara jatqan jas jigit eki jyl buryn kóligi aýdarylyp, aýyr jaraqat alǵan.
Jol apatynan keıin oǵan Atyraý, Almaty jáne Ystambul qalalaryndaǵy aýrýhanalarda operasııa jasalǵan. Qınalǵanyn bildirgisi kelmese de, oǵan ońaı bolmaǵany anyq. Sondaı sátte ata-anasy, dostary men súıiktisi qoldaý bildirgen. Ásirese, Dilnaz Dáýletbaevanyń qoldaýyna jeter eshteńe joq.
Ekeýi kezdeısoq tanysqan. Dáýren qalada turatyn aǵasynyń úıine jıi kelip júrgende Dilnazdy kórgenin aıtady. О́ıtkeni medısına kolledjinde oqıtyn boıjetkenniń ata-anasy aǵasynyń otbasy meken etken kópqabatty úıde turady eken. Bir podezden kirip-shyǵyp júrgen ınabatty boıjetkendi unatqanymen, júrek qylyn shertetin sezimin bildirmegen. Olar jol apatynan keıin bir-birimen jaqyn aralasyp, syrlasa bastaǵan.
– Biz bir jyldan asa birge serýendep, syrymyzdy aıtyp, sóılesip júrdik. Dilnazdyń qınalǵan kezde teris aınalmaı, qoldaý tanytqan adamgershiligine rıza boldym. Ekeýmiz búgingi qıyndyqty birge jeńýge sóz baılastyq. Sodan keıin quda túsý, qyz uzatý, kelin túsirý saltymen toıymyz ótti. Aýylda ata-anamyzdyń janynda bolǵymyz kelgen. Biraq aýylda qolarbamen júrý qıyn ǵoı. Sol sebepten qalada turýǵa sheshim qabyldadyq, – deıdi Dáýren.
Jasy áli otyzǵa tolmaǵan jigittiń aıaǵynan turaryna senimi mol. О́ıtkeni onyń qasynda aıtar sózin qas-qabaǵynan uǵatyn, adamgershiligi mol jary Dilnaz bar. Oǵan jyly sózimen qýat bergen dárigerdiń biri sportpen shuǵyldanýdyń paıdasy tıerine keńes bergen. Dárigerdiń bul keńesi jas jigitti jigerlendirip, úmitin oıatty, senimin nyǵaıtty.
– Bári múmkin ǵoı. Eń bastysy, úmit úzbeý, senimdi qadam basý úshin kúresti toqtatpaý kerek. Bul qıyndyqty jeńetinimizge senemin, – deıdi ol.
Árıne, kez kelgen adam janashyr bola almaıdy. Ásirese taǵdyrdyń synaǵyna tap bolǵan sátte ár pendeniń bet-perdesi de, adamdyq aınasy da anyq ańǵarylady. Degenmen ónegeli otbasydan tárbıe alǵandar ǵana Ánelin aıalaǵan Marlendeı meıirimdiligin, Dáýrenine dem bergen Dilnazdaı ınabattylyǵyn joǵaltpaıtyny daýsyz.
Atyraý oblysy
