Onlaın formatta ótken talqylaýda jýrnalıst mártebesin kúsheıtetin baspasóz kartasyn berer kezde komıssııa quramynda mınıstrlik ókili bolmaıtyny da málim boldy. Al baspasóz kartasyna ıe bolǵan jýrnalıst memlekettik organdar uıymdastyrǵan is-sharalarǵa akkredıtasııasyz óte alatyny aıtyldy.
– Talqylaý kezinde «erekshe jaǵdaılarǵa» qatysty pikir aıtýshylar kóp boldy. Jumys tobymen bul máseleni talqylaǵannan keıin zań jobasynan «erekshe jaǵdaılar» normasy alyndy. Sonymen qatar zańdy talqylaǵanda baspasóz kartalary boıynsha da pikirler aıtyldy. Mysaly, «baspasóz kartasyn beretin komıssııa ýákiletti organnyń janynda bolmaýy kerek», «etıka máselesi zańda bolmaýy kerek» jáne t.b. Osyndaı kommentarılerdi eskere otyryp, zań jobasyna ózgertýler engizdik. Baspasóz kartasy týraly 29-bapta ýákiletti organnyń janyndaǵy komıssııany jáne etıka máselesin de alyp tastadyq, – dedi Aqparat jáne qoǵamdyq damý mınıstrligi BAQ salasyndaǵy memlekettik saıasat departamentiniń dırektory.
Sondaı-aq jıyn barysynda telearnalar men saıttar jasaǵan kontenttiń satylýy týraly sóz qozǵaldy. Iаǵnı zań jobasyna grantty qarjylandyrý sheńberinde óndirilgen ónimge aıryqsha avtorlyq jáne sabaqtas quqyqtar BAQ-qa tıesili degen tetik engizilmekshi.
– Granttarǵa qatysty usynystardy zerdelep, bárin jazyp berdik. Onyń eki túri bolady. Qysqa jáne uzaqmerzimdi grant berý. Uzaqmerzimdi granttar otandyq teleserıaldarǵa arnalǵan. Sondaı-aq taǵy bir mańyzdy másele zańda ýákiletti organ aqparatqa qol jetkizý salasyndaǵy zańnamaǵa sáıkes BAQ úshin granttar berý jáne ótkizý rásimderiniń ashyqtyǵyn qamtamasyz etedi delingen. Memlekettik tapsyrysqa qaraǵanda bizdiń grant berý tetigimiz ashyq bolady. Ony zańda naqty jazyp qoıdyq. Grant aıasynda arnaıy táýelsiz saraptama bolady, – dedi Jasulan О́mirálıev.
Jıyn sońynda Aqparat jáne qoǵamdyq damý mınıstrligi BAQ salasyndaǵy memlekettik saıasat departamentiniń dırektory BAQ-qa negizdelgen zańmen jumystyń maqsaty áli tolyq oryndalmaı jatqanyn tilge tıek etti.
– Erejelerge sáıkes «Mass-medıa týraly» zań jobasynyń nusqasyn ashyq portalǵa engizip, talqylaý júrgizdik. Onyń ishinde kóptegen eskertý boldy. Sonyń aıasynda Memleket basshysynyń atyna aryz da jazylǵan edi. Ony da qarap, pysyqtadyq. Nátıjesinde, jańa nusqasy daıyndaldy. Eskertýler aıasynda ózgertilgen nusqany ashyq portalǵa taǵy da engizemiz. Ári qaraı reglament boıynsha jumystar jalǵasady. Memlekettik organdarmen kelisip, saraptamalar jasalyp jatyr. Sodan keıin zań jobasy Úkimetke joldanady, – dedi ol.
