Qańtar aıynyń basynda Egindikól aýylynda turatyn Mahambet aýyl irgesindegi bulaq basynda jalǵyz aqqý júrgenin, qatty aıazda qustyń qanatyna muz qatyp, jaǵdaıy qıyndaı bastaǵanyn kórip, úıine ákelgenin, tamaq-sýyn berip asyrap otyrǵanyn habarlap edik.
Eki aıdan asa jabaıy qusty óz úıinde baǵyp shyqqan ormanshy kóktem kelisimen aqqýdyń minezi ózgerip, eleńdeı bastaǵanyn, tamaqqa burynǵydaı tábeti tartpaı qalǵanyn baıqaǵan. Jyl qustary kelip, aýyl mańyndaǵy kólge qaz-úırek qona bastaǵan eken. «Qusty erkindikke jiberetin ýaqyt jetken eken» deıdi Mahambet.
- Aqqýdy jiberer aldynda Nurǵısa atamyzdyń áıgili «Aqqý» kúıin, Ǵarıfolla Qurmanǵalıevtiń oryndaýyndaǵy «Alýash» ánin telefonnan oınatyp kórdim. Biraq eki aıdan asa tar qapasta eriksiz turǵan, erkindikti ańsaǵan aqqýdyń lırıkaǵa asa zaýqy bolmaǵan sııaqty. Mahambet aǵa sý jaǵasyna aparyp qoıa bergen kezde qanatyn sabalap sý betimen ushyp baryp, ashyq aıdynǵa jetken soń otyra sala jýyna bastady. Basyn sýǵa qaıta-qaıta tyǵyp, qanatyn taranyp, kóp jýyndy. Shamasy ábden kirlese kerek. Aqqýdyń shomylǵanyn bir saǵatqa jýyq baqylaǵan soń boıymyz tońazyp, ketip qaldyq, - deıdi osy sátke kýá bolǵan Qaratóbe aýdandyq ishki saıasat bóliminiń basshysy Nurtas Safýllın.
«Aqqý shynymen óte taza qus eken. Qys boıy qorada turǵanda ár jerge sańǵymaıtynyn, tek bir jerge otyratynyn baıqadym», deıdi Mahambet Qusaıynov.
Aıta keteıik, Batys Qazaqstan oblysynda ekologııalyq máselelermen shuǵyldanyp, kóptegen ıgi istiń basynda júrgen «Telegeı» qoǵamdyq birlestiginiń músheleri, ózge de qoǵam belsendileri Egindikólge jem-dán jiberip, kómektesip turdy.
Mahambet Rahmadenuly Qaraǵash orman sharýashylyǵynda 13 jyldan beri qyzmet etedi. «Týǵan jerdiń tabıǵatyn, onyń ań-qusyn kóziniń qarashyǵyndaı qorǵap júrgen ormanshynyń eńbegi laıyq baǵalansa eken» deıdi aýyldastary.
Batys Qazaqstan oblysy
