«Naýryz – jyl basy, halqymyz ejelden toılaǵan kóktem merekesi. Bul – halyq asyǵa kútetin asa erekshe meıram, qystyń yzǵary qaıtatyn, kóktem shýaǵyn tógetin sát. Tabıǵat túlep, tirshilik qaıta jańaratyn mezgil.
Elimiz Áz-Naýryzdy árdaıym yrysty yntymaqtyń bastaýyna balaǵan. Alystaǵy aǵaıyn Ulys kúni tatýlasyp, qaıta qaýyshqan. Jurt bir-birine aqjarma tilekterin aıtqan. Kópshilik ortaq dastarhannan dám tatyp, qarııalar jastarǵa batasyn bergen.
Babalarymyz Naýryz toıyn jasampaz eńbektiń meıramy sanaǵan. Bulaqtyń kózin ashyp, aǵash otyrǵyzǵan. Elge paıdasy tıetin ıgi ister atqarǵan. Bir sózben aıtsaq, Ulystyń uly kúni – jańa ómirdiń jarshysy», dedi Prezıdent.
Qasym-Jomart Toqaev Naýryz meıramynyń barshaǵa ortaq meıram ekenin atap ótti.
«Bul meıramdy halqymyz tutas el bolyp, bir ult bolyp túgel toılaıdy. Naýryz kezinde búkil elge ortaq qundylyqtar dáripteledi. Iаǵnı, Áz-Naýryz – naǵyz halyqtyq meıram», dedi Toqaev.
«Ár shańyraqqa qydyr qonyp, baq darysyn! Jańa jyl qut-bereke ákelsin! Ulys oń bolsyn! Aq mol bolsyn!», dep tilegin bildirdi Prezıdent.
