Atshabardyń tusaýkeser rásiminde attyń qulaǵynda oınaǵan qyz-jigitter qazaqtyń dástúrli qyz qýý, teńge ilý sekildi ulttyq at sporty túrlerinen ónerlerin pash etti. Sodan soń kezek teatrlandyrylǵan kóriniske jetip, elimizdiń ár óńiriniń salt-dástúrin nasıhattaıtyn Batys pen Shyǵystyń, Soltústik pen Ońtústik ólkeleriniń atynan shyqqan kósh kerýeni minberdegi júzdegen kórermenniń aldynan júrip ótti. Atqa jegilgen kúıme, ásem bezendirilgen túıelermen mań-mań basyp júrip ótken kerýen ishindegiler ár óńirdiń týmalary men tanymal azamattary jáne belgili ónerpazdary men sportshylary boldy. Máselen, Batys kerýenin elimizge belgili ánshi T.Asar bastasa, Shyǵys kerýenin dástúrli ánshi A.Balajanova óziniń ásem ánimen sońynan ilestirdi. Soltústik aımaqtyń kerýeniniń aldynda án salyp shyǵý tanymal estrada ánshisi M.Sádýaqasovaǵa buıyrdy, al Ońtústiktiń kerýenin dástúrli ánshi N.Serikbaeva tizginine aldy. Munan keıin at sportynyń maıtalman jigitteri akrobatıkalyq tásilmen biriniń ústine biri mingesip, kók týymyzdy tóbelerine kóterip báıge alańynyń kórermen otyrǵan tusynan alyp ótti.
Saltanatty sharada Shymkent qalasynyń ákimi Murat Áıtenov pen osy alyp atshabardy shaharǵa tartý retinde salyp bergen otandyq «BI GROUP» qurylys kompanııasynyń bas dırektory Aıdyn Rahymbaev quttyqtaý sóz sóıledi.
Sóz tizginin birinshi alǵan kompanııa basshysy A.Rahymbaev «osydan bir jarym jyl buryn megapolıs halqyna zamanaýı, halyqaralyq standarttarǵa saı keletin jap-jańa ıppodrom salyp beremiz dep ýáde bergen edik. Sol ýádemizde turyp, búgin mine onyń ashylý saltanatyn toılap otyrmyz. Bile bilsek, bul Qazaqstandaǵy eń úlken atshabar kesheni bolyp sanalady», dedi.
О́z kezeginde qala ákimi M.Áıtenov osynaý alyp atshabardy óz qarjysyna turǵyzyp, sóıtip, shymkenttikterdiń ıgiligine paıdalanýǵa tapsyrǵan «BI GROUP» kompanııasynyń jomarttyǵy men saýapty isine alǵysyn bildirdi.
«Naýryz meıramynyń qarsańynda ulttyq sporttyń damýyna úlken úles qosatyn zamanaýı ıppodromnyń ashylýyna oraı barshamyz bas qosyp otyrmyz. Bizdiń búgingi qýanyshymyzǵa ortaqtasyp kelgeni úshin kezinde Shymkenttiń, tutas ońtústik óńiriniń aıaqqa turýyna aıanbaı ter tókken eńbek ardagerlerine, qadirmendi aqsaqaldarǵa alǵysymdy aıtamyn. Endeshe, Naýryz merekesi barshamyzǵa qutty bolsyn! Shyn máninde, bul oqıǵa qala tarıhynda óziniń óshpes izin qaldyrary sózsiz. Al ıppodromnyń ashylý saltanatyna oraı ulttyq sport túrlerinen halyqaralyq jarys uıymdastyrylatyn bolady. Oǵan 1 myńnan astam sportshy, sonyń ishinde 126 sheteldik óren qatyspaq. Aldaǵy ýaqytta, jańa ıppodrom ulttyq at sportynyń damýyna, túrlenýine tyń serpin beretini sózsiz», dedi shahar basshysy.
Osylaısha, ıppadromnyń ashylý saltanatyna arnalǵan merekelik baǵdarlama sońy jappaı «Qarajorǵa» bıine ulasty.
Al ıppodromnyń ózine kelsek, mundaǵy báıge alańy elimiz boıynsha eń úlkeni. Onyń aýmaǵynda 1 500 kórermenge arnalǵan trıbýna, at arenasy bar manejder, jabyq stend ǵımaraty, veterınarlyq blok bar jáne 300-den astam kólikke arnalǵan turaq qarastyrylǵan. Trıbýnanyń joǵary qabatynda ashyq terrasa jaıǵasqan. Uzyndyǵy 2012 metrlik jarys joly birden kózge túsedi. Kókpar men konkýr sportyna arnalǵan alańdarǵa arnaıy kvars qumy tóselip, tabıǵı tastarmen bezendirilgen. Sondyqtan sóz joq álemdik standarttarǵa saı salynǵan ıppodrom megapolıstegi halyqaralyq dárejedegi ulttyq oıyn-saýyq jarystaryn ótkizetin úlken sport alańyna aınalyp otyr.
О́z kezeginde atshabardaǵy Ulystyń uly kúni «GREAT QAZAQ GAMES» ıaǵnı qazaqtyń ulttyq oıyndarymen jalǵasyn tapty. Osy sporttyq jarysta elimizdiń barlyq óńirinen jáne Túrkııa, Qytaı, Mońǵolııa, О́zbekstan, Qyrǵyzstan, Tájikstan, Reseı, Saýd Arabııasy men Iordanııadan kelgen sportshylar baq synasady. Olar 3 kún boıyna kókpar, báıge, qyz qýý, teńge ilý, aýdaryspaq, qazaq kúresi, dástúrli sadaq atý, jamby atý, toǵyzqumalaq jáne ózge de ulttyq sport túrleri boıynsha júldege talasady.
Máselen, Túrkııadan kelgen sportshy Enıs Mýstafa Iýrdokok toǵyz jyldan beri jamby atýmen aınalysady. Bul sport túrine degen mahabbat dosy Eldos Qazaqstanǵa qonaqqa shaqyrǵan sátten bastalypty. Sportshynyń jasy – qazir 65-te. Biraq soǵan qaramastan, ózin tyń sezinedi jáne jeńiske degen qulshynysy basym. Qazaqstannan júldesiz qaıtpaımyn dep ózine senim bildirip otyr. Qonaqqa jańadan ashylǵan ıppodrom erekshe unapty. At sportyn damytýǵa barlyq jaǵdaıdyń jasalǵanyn kózben kórgen. О́ziniń aıtýynsha, Túrkııada da ulttyq sport túrlerine erekshe qamqorlyq kórsetiledi. Memleket pen jeke azamattar tarapynan ulttyq sporttyń keń etek jaıýyna, el ishinde nasıhattalýyna yqylas joǵary. Túrkııalyq sportshynyń óziniń de jeke sport klýby, mektebi bar eken. Ol sonda balalardy jattyqtyrýmen aınalysady.
Sol sekildi Mýaz Attamımı óziniń seriktesi Abdýlla Attamımımen sonaý Saýd Arabııasy jerinen sadaq atý jarysynan qomaqty júlde alyp ketý úshin at arytyp kelip otyr. Jas sportshy Djıdda qalasyndaǵy ýnıversıtette dintaný fakýltetinde oqıdy. Alaıda atqa miný, sadaq tartý onyń qoly bos kezde aınalysatyn súıikti isi eken. Oǵan kóne zamandaǵy batyrlardyń izin jalǵaýǵa ákesi rýhanı demeý bergen.
