«Qazmedıadaǵy» aqshańqan aýyl

Aıtýly merekege Aqparat jáne qoǵamdyq damý mınıstri Darhan Qydyráli qatysyp, jı­nal­ǵandardy meırammen quttyqtady.

– Barshańyzdy jer jarylyp kók shyqqan, kók jarylyp kún shyqqan Ulystyń uly kúni – Naýryz meıramymen quttyqtaımyn! Ulys oń bolsyn, aq mol bolsyn! Irgemizden attaǵan Qoıan jyly jaqsylyqtyń, berekeniń, tazalyqtyń jyly bolsyn! Jańa jyl yrys-bereke, molshylyq ákelsin! Naýryz – bizdiń tól jańa jylymyzdyń bas­taýy, jańǵyrý men jańa ómirge umtylýdyń nyshany. Kún men tún teńelip, jaryq qarańǵyny jeńgen, el shattyqqa kenelip, jylý sýyqty jeńgen bul qasıetti mereke – babalarymyzdan qal­ǵan mıras, kóneden qalǵan dás­túr. Tabıǵatty túletip, tirshilik­ti shýaq­qa bóleıtin kóktem mere­kesin kúlli jurt asyǵa kútetini belgi­li. Halqymyzdyń ejelgi jyl esebi – úlken ulttyq máde­nıet pen ónegesi men taǵylymy mol tarıhymyzdyń aıǵaǵy. Memle­ket basshysy «Naý­ryz meı­ramyn atap ótý tujy­rym­damasyn jasap, kóktem mere­kesiniń mazmunyn baıyta túsken jón» degen edi. Bul oń bastama áz Naýryzdy urpaqqa ónege, ár sáti elge paıdaly bolatyn ıgilikke aınaldyrdy, – dedi D.Qydyráli.

Sondaı-aq ol sóz arasynda, mınıstrlikke qarasty ujym­dar saılaý kezinde túrli áleý­mettik zertteýler júrgizip, sal­maqty saıası saraptamalar ja­saǵanyn, «Qazaqstan», «Habar» telearnalarynda túrli debattar uıymdastyrylyp, tuńǵysh ret 17 saǵatqa sozylǵan onlaın marafon ótkenin aıtty. Iаǵnı eldegi saıası naýqan ýaqytynda jańalyqtar jedel taratylyp, jýrnalıster jarǵaq qulaǵy jastyqqa tımeı jaqsy jumys atqarǵanyn erekshe atap ótti.

– Tarıhı kezeńde osyndaı irgeli isterdiń ótýine atsalysqan aqparat salasynda júrgen barsha áriptesterimizge jáne mınıstrlikke qarasty barlyq ujymǵa alǵys rızashylyǵymdy bildirgim keledi. Sizderdiń qajyrly qyzmetterińiz ben súbeli úlesterińiz qandaı qurmetke bolsa da laıyq. Búgin, mine, barsha áriptesterimiz pandemııadan keıin alǵash ret bas qosyp, mınıstrlikke qarasty uıymdar, qanattas mekemelerimiz arnaıy kıiz úı tigip, Naýryz meıramynyń kórkin asyryp, tamasha is-shara uıymdastyryp otyr. Ulttyq naqyshpen kıim kıgen azamattarymyz ben kóktemdeı qulpyrǵan qyz-kelinshekterimiz merekeniń sán-saltanatyn keltirip, jarasymyn arttyra túskendeı. Bizdiń mınıstrlik azamattyq qoǵamnyń damýyna jaýapty bolǵandyqtan, qasterli qundylyqtardy ulyq­tap, kópke úlgi-ónege kórsetýi zańdy­lyq dep bilemiz. Meıramǵa oraı uıymdastyrylatyn is-shara­lar, sporttyq jarystar ujym­nyń yntymaǵyn, aýyzbirligin arttyra túsedi dep senemiz. Izgi dástúrlerimizdi qasterlep, bereke-birligimizdi nyǵaıtar taǵy­lymdy jıyndar kóp bolsyn, – dedi Aqparat jáne qoǵamdyq damý mınıstri.

«Qazmedıa» ortalyǵynyń bi­rin­shi qabatynda uıymdasty­ryl­ǵan Naýryz meıramynda ár­bir ujym óz kıiz úılerin tigip, mol dastar­qan­ǵa ulttyq taǵam­daryn qoıdy. Máselen, Konfes­sııaaralyq jáne órkenıetaralyq dıalogti damytý jónindegi N.Nazar­baev ortalyǵy «Qoǵamdyq kelisim» RMÝ jáne Etnosaıasattaný ınstıtýty birlesip tikken «Beıbitshi­lik aýyly» kıiz úıinde Beıbitshi­lik pen kelisim murajaıynyń qundy jádigerleri qoıylǵan. Murajaıdyń biregeıligi onyń kompozısııalarynyń ejelgi dáýirden búgingi kúnge deıingi Qazaqstan aýmaǵynda beıbitshi­lik, kelisim jáne órkenıetter mádenıeti qundylyqtarynyń qalyptasý jáne damý tarıhyn tolyq beıneleýinde.

Sanaýly saǵat ishinde qazaq aýylyna aınalǵan ortalyqta ultymyzdyń salt-dástúrleri dáriptelip, ádet-ǵuryptary «Tusaý kesý» men «Jol tańdaý» kór­setildi. Sondaı-aq «Arqan tartý», «Asyq atý», «Láńgi tebý», «Qol kúres» sekildi ulttyq oıyn­dardan saıystar da uıymdas­tyryldy. Is-sharada «Saryarqa» ha­lyq aspaptar ansambliniń oryn­­daýynda sybyzǵy, sazsyr­naı, prı­maqobyz, narqobyz, qy­lqo­byz­da «Yńǵaıtók», Qur­man­­ǵazynyń «Balbyraýyn» kúıi, «Adaı» shy­ǵar­malary oryndaldy.

Keıin mınıstr ortalyqtaǵy «Habar» arnasynyń qurǵan kıiz úıinde qonaq bolyp, búldirshin­niń tusaýyn kesti.

Ulystyń uly kúnine ar­nal­ǵan ulaǵatty is-sharaǵa «Qazaq gazetteri» seriktestiginiń ujymy da erekshe úles qosty. Ult basylymdarynyń bas egesi bul joly Aqparat jáne qo­ǵam­dyq damý mınıstrligine qaras­ty «Aqparat jáne taldaý» orta­lyǵy, «Qazmedıa» ortalyǵy jáne «Qazkontent» aksıonerlik qoǵamymen birlesip aqshańqan qazaq úı tikken bolatyn. Sán-saltanaty jarasqan alańda áýezdi ásem án shyr­qalyp, kúmbirlegen kúı tyń­dal­dy.

Aıtpaqshy, «Qazaq gazetteri» serik­testiginiń ujymy kelýshi­lerge erekshe syı jasady. Mereke qonaqtary arnaıy qoıylǵan 3D prınteri arqyly asyqty basyp shyǵarýǵa kýá boldy. Alǵashynda ozyq tehnologııa kómegimen qol­ma qol jasalǵan asyqty qyzyq­taýshylar qarap turmaı, dástúrli asyq oıynyna kirisip te ketti.

Osy­laı­­sha, jýrnalıster qaýymy Naýryz me­re­kesin sán-saltanatymen atap ótti.