Ádettegideı áz Naýryzǵa Aıagóz aýdandyq aýrýhanasy erekshe daıyndalady. Ár bólimde naýryz kóje sapyrylyp, aq dastarqan jaıylady. Medısına qyzmetkerleri bir-birine qutty bolsyn aıtysyp, aqjarma tilekterin arnaıdy. Kúı kúmbirleıdi, án shyrqalady. Bıyl bárinen buryn kópshiliktiń nazary ulttyq kıim kıgizilip, perzenthanadan shyǵarylǵan nárestelerge aýdy.
– Aýrýhanamyzdyń perzentahanasynda qazaqı oıý-órnektermen, shańyraqpen bezendirilgen bosaný bólmesi ashyldy. Tól merekemizge jylda asa jaýapkershilikpen, joǵary kóńil kúımen daıyndalamyz. Aýrýhananyń ár bólimi Naýryz merekesinde bar ónerin ortaǵa salady. Sonyń ishinde kópshiliktiń kózine túsken perzenthana bólimi edi. Nárestelerge ulttyq kıim kıgizip, úılerine shyǵaryp salyp jatqany kózge qandaı jyly kórinedi?! Jyl basy ár otbasyna osyndaı qýanysh syılasyn! – deıdi aýrýhananyń bas dárigeri Shalqar Omarov.
Aıta ketsek, Ulystyń uly kúni qarsańynda perzenthanadan ulttyq kıimmen 11 bala shyǵaryldy. Olardyń altaýy qyz, beseýi ul. Sonymen qatar aıdyń basynda týǵan egizder de oıýly kıim kıip, úılerine shyǵaryldy. Olarǵa osy ýaqytqa deıin qajetti neonatologııalyq kómekter kórsetildi. Dárigerlerdiń aıtýynsha, týǵan kezde egizderdiń salmaǵy 1 200, 1 300 gramm ǵana bolǵan eken. Qazir barlyǵy qalypty desedi.
Sondaı-aq Aıagóz perzenthanasynan tórtinshi ret ana atanǵan Tarbaǵataı aýdany Aqjar aýylynyń turǵyny Aqmaral Zakarııa da nárestesimen saltanatty túrde shyǵaryldy. Onyń aıtýynsha, kútpegen tosynsyı jasaǵan aýrýhana qyzmetkerleriniń ıdeıasy óte kreatıvti. «Perzenthanadan shyǵýǵa daıyndalyp jatqanymyzda nárestege ulttyq kıim syıǵa tartty. О́te qýanyshtymyz. Naýryz ár shańyraqqa jaqsylyq ákelsin. Nárestelerimizdiń ǵumyry uzaq bolsyn!» deıdi Aqmaral.
Iá, Aıagózdiń perzenthanasyndaǵy jyly kóriniske kópshiliktiń tańdaı qaǵa qaraǵany ras. Ulystyń uly kúni týǵan náresteler ult úshin eńbek qylatyn azamat bolyp óssin deımiz.
Abaı oblysy,
Aıagóz aýdany
