Qazaqstan – biz úshin ózara yntymaqtastyqtyń basym baǵyty - Ma Sınjýı

Áńgimelesý barysynda óńiraralyq yntymaqtastyqty damytý máselesine erekshe nazar aýdaryldy. Qazaqstan Shyńjań ólkesimen ónerkásip, kólik, logıstıka, aýyl sharýashylyǵy jáne týrızm sekildi kóptegen baǵyt boıynsha tabysty qarym-qatynas jasap otyr.

Kezdesýde Qasym-Jomart Toqaev Qazaqstan Qytaımen strategııalyq seriktestik pen máńgilik dostyq rýhynda jan-jaqty yntymaqtastyqty tereńdetýge basa mán beretinin aıtty. Memleket basshysy eki el arasynda barlyq deńgeıde belsendi ári senimdi saıası dıalog qalyptasqanyna toqtalyp, QHR-dy Qazaqstannyń basty saýda seriktesteriniń biri retinde atap ótti.

«Qytaı Halyq Respýblıkasynyń Tóraǵasy Sı Szınpın myrzanyń byltyr qazan aıynda Qazaqstanǵa jasaǵan sapary óte sátti bolǵanyn aıtqym keledi. Bul SOVID pandemııasy saldarynan bolǵan uzaq úzilisten keıingi birinshi sapar ekenin atap óttik. Biz óte mańyzdy kelisimderge qol jetkizdik. Eki eldiń úkimetteri men tıisti aımaq basshylaryna eń joǵary deńgeıde qol jetkizgen ýaǵdalastyqtardy tabysty júzege asyrý mindeti júkteldi», dedi Prezıdent.

О́z kezeginde Ma Sınjýı qonaqjaılyq kórsetkeni úshin Qasym-Jomart Toqaevqa alǵys aıtyp, QHR Tóraǵasy Sı Szınpınniń sálemin jetkizdi.

«Meniń saparymnyń negizgi maqsaty – QHR Tóraǵasy Sı Szınpın men Sizdiń arańyzdaǵy mańyzdy strategııalyq kelisimderdi júzege asyrý. Biz Qytaıdyń bir ólkesi retinde elimizdiń batysyndaǵy memlekettermen qarym-qatynastardy nyǵaıtýǵa jaýaptymyz. Qazaqstan – biz úshin ózara yntymaqtastyqtyń basym baǵyty. Jalpy, Qytaı men Qazaqstannyń yntymaqtastyǵy Shyńjań arqyly júzege asyrylady», dedi Ma Sınjýı.

Kezdesý sońynda  Prezıdent Shyńjań basshysynyń Qazaqstanǵa sapary óńiraralyq baılanysty tereńdetip, onyń baǵyt-baǵdaryn naqtylaı túsýge tyń serpin beretinine nazar aýdardy.

Sondaı-aq Qasym-Jomart Toqaev Sı Szınpınniń QHR Tóraǵasy bolyp qaıta saılanýyna baılanysty oǵan izgi tilegin joldap, sáttilik tiledi.