– Aýylǵa kireberiste uzyndyǵy 50 metrdeı jol sý astynda qaldy. Odan ári 100 metr ótken soń, taǵy 100-150 metr greıderdi sý basyp jatyr. Sol eki jer telegeı-teńiz. Bul endi qazir keppeıdi. Jurttyń bári kóldi aınalyp ótip jatyr. Biraq dala áli durys kebe qoıǵan joq. Aýyldan shyqqan kólikter ár jerde batyp qalyp jatyr, deıdi Ahmet aýlynyń turǵyny Narıman Shorman.
Jol ústindegi sýdyń tereńdigi shamamen jarty metrge deıin barady. Munda qazir oblystyq tótenshe jaǵdaı departamentinen kelgen 3 tehnıka, 14 qutqarýshy, jergilikti ákimdik bólgen 4 tehnıka men 30 adam jumys istep jatyr. Oqıǵa ornyna kelgen oblystyq tótenshe jaǵdaı departamenti bastyǵynyń mindetin atqarýshy, azamattyq qorǵanys polkovnıgi Azamat Orynbaevtyń aıtýyna qaraǵanda, sońǵy kúnderi Uly Jylanshyq ózenindegi sý deńgeıi birtindep tómendeı bastaǵan. Sondyqtan aldaǵy 4-5 kúnniń ishinde sý tómende turǵan Aqkólge qaraı tartylyp, kóp keshikpeı jol da ashylady degen boljam bar.
Aqkóldiń aınalasy aq teńizge aınalǵanymen eldi mekender men sharýashylyqqa qaýip tónip turǵan joq. Sý tartylǵansha jaǵdaıdy qutqarýshy mamandar baqylap otyratyn bolady.
Al jergilikti turǵyndar jol qatynasynyń qıyndap ketkenine qynjylǵanymen, sýdyń mol kelgenin jaqsylyqqa balap otyr. Baıaǵyda teńiz bolyp tolysyp jatatyn Aqkóldiń sýy jyl sanap azaıyp, tartylyp, jaǵadan uzap ketken edi. Birneshe jylǵa sozylǵan qurǵaqshylyqtyń saldarynan Ahmet aýylynyń aınalasy da qý taqyrǵa aınalyp, jurt aýyldan 110 shaqyrymǵa deıin uzap baryp shóp shaýyp ákeletin jaǵdaıǵa jetken.
Oblys ortalyǵynan 700 shaqyrym alys, qııanda jatqan eki aýyldyń turmys-tirshiligi Uly Jylanshyq ózeni men Aqkólge qarap otyr. Kóldiń jan-jaǵynda birneshe sharýa qojalyqtary bar. Olar baǵyp otyrǵan maldyń qońdy-qońsyz bolýy da Aqkólge baılanysty.
– Men osy aýyldyń baıyrǵy turǵynymyn. Jasym – 81-de. Mynaý – Allanyń kópten kórsetken sýy. Sońǵy ret 2005 jyly kelip edi. Bıyl taǵy qaptap kelip, búkil aýyl qýanyp jatyr. Áý basta sel basyp kete me degen qorqynysh bolyp edi. Qazir ózen tartyp ketti. Bári ornyna keleıin dep tur. Eshqandaı qaýip joq. Bizdiń qamymyzdy oılap oblystan kelip jatqan qutqarýshylarǵa kóp-kóp rahmet. Búgin aýdan ákimi de kelip, jaǵdaıdy óz kózimen kórip ketti. Bıyl joldyń sý basqan tusyn bıiktetip, sý ótkizgish qubyr salamyz dep ýáde etti. Qazirgi jaǵdaıymyz jaman emes. Tasyǵan sý Aqkólge quıylyp jatyr. Bul kól bizdiń yrysymyz. Aqkóldiń sýy mol bolsa, balyq ta, shóp te mol bolady, deıdi Ahmet aýylynyń turǵyny Qasqyrbaı Kenjeǵulov.
Oblystyq tótenshe jaǵdaı departamentiniń málimetinshe, qazirgi tańda oblys aýmaǵyndaǵy eldi mekenderge sý tasqynynan qaýip tónip turǵan joq. Ońtústikke qaraı ornalasqan Arqalyq, Amangeldi, Jangeldın aýdandarynda qardyń 95 paıyzy erigen. Qyzyl sý ózen arnalaryna túsip, sý tasyp jatyr. Biraq sýdyń deńgeıi birte-birte tómendep keledi.
Qostanaı oblysy
