Qosh delik! Sonymen megapolıste Naýryz merekesi qatarynan úsh kún boıy toılandy. Rasy kerek, mundaı dýmandy shymkenttikterdiń birinshi márte kórýi bolsa kerek-ti. Naýryzdyń 21-22 kúnderi shaharda merekege baılanysty birneshe qyzyqty konserttik baǵdarlamalar men is-sharalar ótti. Sonyń biri atshabarda «Qazaqtyń uly oıyndary» atty ulttyq sport túrlerinen jarys uıymdastyryldy. Oǵan elimizden bólek Qyrǵyzstan, О́zbekstan, Mońǵolııa, Saýd Arabııasy, Reseı, Polsha, Túrkııa syndy memleketterden kókparshylar, sadaq atýshylar, báıgeshiler qatysty. Júlde qory qomaqty bolǵandyqtan, ári tarazy basynda eldiń abyroıy turǵandyqtan ár sportshy jarysta jeńiske jetýge baryn salary anyq. Jańa ıppodromda sportshylar at jarystyryp, báseke kórigin qyzdyrsa, dál sonyń janynda ornalasqan etnoaýylda 170-ke jýyq kıiz úı tigilip, munda da Naýryzdyń qyzyqty is-sharalary bastaldy. Jastardyń bir bóligi aýyl mańyndaǵy altybaqanda seıil qursa, atalar men ájeler ulttyq kıimderimen ortaǵa jarqyraı shyǵyp, halyqtyń dástúrli ánderinen shashý shashty. Budan bólek sadaq atýdan tuńǵysh ret I Azııa kýbogi uıymdastyryldy. О́zimizdiń jáne kórshiles elderden kelgen balýandar beldesip, túıe palýan júldesine talasty. Odan bólek sýyryp salma aqyndarymyz Naýryz aıtysta jyr dodaǵa túsip, sóz tapqyrlyqtyń sheshendik úlgisimen kópshilikti súısintti. Asyq atýdan da órender jarysy qyzyqty ótti. «Asyq oınaǵan azar» degen uǵym bul básekege jaramady. О́ıtkeni jarysta asyq atyp, júldege ilikkender qomaqty syılyq arqalap qaıtty. Sondaı-aq taı qazanǵa Naýryz kóje pisirilip, kelgen qonaqtardyń bári odan dám aýyz tıdi. Merekede eki tonnadan astam Naýryz kóje daıyndalypty. Bul da bir – ózinshe rekord!
Halyqty áz-Naýryzben quttyqtap, jurttyń qýanyshyn bólisýge kelgen Mádenıet jáne sport mınıstri Ashat Oralov óziniń júrekkjardy tilegin jetkizdi.
«Memleket basshysy Qasym-Jomart Toqaev «Táýelsizdik bárinen qymbat» atty maqalasynda Naýryz merekesin atap ótý tujyrymdamasyn túsindirip bergen edi. Osyǵan baılanysty Mádenıet jáne sport mınıstrligi Ulystyń uly kúnin toılaýdyń jańa tujyrymdamasyn bekitti. Osynyń negizinde áz-Naýryzdy búkil óńir bir kúnde atap ótpeı, «Amal merekesi», «Tarıhqa taǵzym» sekildi dataly kúndermen birge 10 kún boıyna toılaý qarastyryldy. Sondyqtan biz osynaý baǵdarlama aıasynda jańa ıppodromda kóshpendiler rýhyn oıatqan keremet sporttyq oıyndardyń kýási bolyp otyrmyz. Balýandar beldesýi, alaman báıge, teńge ilý, kókpar tartý sııaqty ulttyq sport jarystaryn kórip delebemiz qozyp, bir marqaıyp qaldyq. Munyń barlyǵy da birinshiden, Naýryz merekesiniń sánin keltirse, ekinshiden, aldaǵy jyly elimizde týy jelbireıtin «Dúnıejúzilik kóshpendiler oıynyna» qyzý daıyndyǵymyzdyń bastamasy», dedi mınıstr.
Ulystyń Uly kúni – Naýryz meıramyn Assambleıa músheleri de jyl saıyn dástúrli túrde atap ótedi. Osy oraıda QHA janyndaǵy qurylymdar, etnomádenı birlestik ókilderi «Dostyq úıiniń» aldyna kıiz úı tigip, saltanatty jıyn uıymdastyrdy. «Armysyń, áz-Naýryz!» atty saltanatty sharanyń qyzyqty ótýine Assambleıa janyndaǵy 17 etnomádenı birlestiktiń tóraǵalary men ókilderi, 7 qoǵamdyq qurylym – Aqsaqaldar keńesi, Analar keńesi, Jýrnalıster men blogerler klýby, «Assambleıa jastary» uıymy, Medıasııa keńesi, Ǵylymı-sarapshylyq top, Kásipkerler uıymynyń músheleri bir kisideı atsalysty. Shymkent qalalyq ishki saıasat jáne jastar isteri jónindegi basqarma basshysy M.Shotanov Naýryz meıramy – ótkendi saralap, búgindi baǵamdaıtyn jáne kún men tún teńelip, aınala jańaratyn ıgi mereke ekenin atap ótti. Sonymen birge el yntymaǵyn nyǵaıtyp, tatýlyǵyn saqtaý jolynda úlken úles qosyp otyrǵan Qazaqstan halqy Assambleıasy ókilderin Ulystyń uly kúnimen quttyqtady. Al etnos ókilderiniń Naýryz merekesin tamashalaýǵa kelgen jurt «Dostyq úıi» men «Birlik úıi» degen atpen tigilgen qos kıiz úıge bas suǵyp, jaıylǵan dastarqannan dám aýyz tıdi. Mereke aıasynda qonaqtarǵa «Naýryz kádesi» úlestirilip, láńgi, asyq atý sekildi ulttyq oıyndar oınatyldy.
Budan bólek qalanyń ár aýdan ákimdiginde de áz-Naýryz merekelendi. Máselen, Abaı aýdanynyń turǵyndary Ulystyń uly kúnin kıiz úı tigip, túrli taǵamdar pisirip, kópshilik oıyn-saýyq is-sharalaryn uıymdastyrý arqyly toılady. Sondyqtan abaılyqtar otbasylarymen birge Asar shaǵyn aýdanyndaǵy ortalyq alańǵa jınalyp, Shyǵystyń basty merekesi, jańarǵan kóktemniń naqyshyna aınalǵan Naýryzdy kóterińki kóńil kúımen, shat-shadyman jarqyraǵan júzben atap ótti.
Aýdan ákimi Buharbaı Parmanov turǵyndardy Naýryz meıramymen quttyqtap, bul kún bereke men birliktiń, meıirimdilik pen ózara syılastyqtyń qasıetti merekesi ekenin tilge tıek etti.
«Tamyry tereń tartqan áz-Naýryz qaı kezde de eńsesi bıik eldiktiń, irgesi sógilmes birliktiń, yrys pen yntymaqtyń merekesi bolǵan. Búginde ejelgi meıram bizdiń jańarǵan qoǵamymyzben úılesim taýyp, Otanymyzdaǵy dostyq pen kelisimin nyǵaıtýda mańyzdy ról atqarady. Árbir eldiń táýelsizdigi, ulttyq birligi jáne beıbit ómiri men bir shańyraq astyndaǵy tatý-tátti keshken ǵumyry onyń basty qundylyǵy sanalady. Biz úshin Táýelsizdikten asqan murat, Máńgilik Elden asqan maqsat joq! Ejelden jańarý men jasampazdyqtyń bastaýy, yrys pen berekeniń arqaýy bolǵan áz-Naýryz halqymyzdyń qajyrly eńbeginiń, tolaǵaı tabysynyń bastaýy bolsyn», dedi ol.
Shattyqty merekeni tamashalaýǵa kelgen qonaqtarǵa №89 mektep-lıseıi men daryndy balalarǵa arnalǵan №90 mektep-gımnazııasynyń oqýshylary dýmandy konsert qoıyp berdi. Sonymen birge qarapaıym turǵyndar da bastamashylyq tanytyp, kıiz úıler tikti, dastarqan jaıdy. Jalpy, jurtshylyq, Naýryzdy birge qyzyqty etip ótkizýge barynsha atsalysty. Bul kúni merekeni barshaǵa sezdirý úshin jalpaq jurtqa tegis naýryz kóje, sýmelek, baýyrsaq pen palaý taratyldy. Aıta ketý kerek, Shymkentte besinshi aýdannyń qurylýyna baılanysty Abaı aýdanynyń aýmaǵy ózgergen. Osynyń aldynda aýdanǵa 34 eldi meken qaraıtyn. Al qazir onyń sany 27 eldi mekenge qysqardy. О́z kezeginde Asar shaǵyn aýdany aýmaqtyq bólinis barysynda Abaı aýdanynyń quramynda qaldy.
Jalpy, «Uly qazaq oıyndary» ulttyq sport jarysy men «Naýryz Shymkentten bastalady» atty merekelik shara 22 naýryzda qorytyndylandy. Al keshke qalanyń ákimshilik-iskerlik ortalyǵyndaǵy Astana alańynda elimizdiń estrada juldyzdarynyń jáne jergilikti ónerpazdardyń qatysýymen gala-konsert ótti. Osymen áz-Naýryzǵa arnalǵan ádemi baǵdarlamalyq is-sharalar jıyny óz máresine jetti.
