«Elimizdiń óndiristik áleýetin barynsha arttyrý mańyzdy. Qazaqstan ekonomıkasy áli kúnge deıin paıdaly qazbalarǵa táýeldi bolyp otyr. Iаǵnı, el ekonomıkasynyń qurylymy – qarapaıym. Shyn máninde, bizge qarqyndy damý úshin kúrdeli, ártarapty ekonomıkalyq qurylym qajet. Árıne, shıkizat naryǵyndaǵy álemdik básekede bizdiń óz artyqshylyǵymyz bar. Qazirgi jáne strategııalyq mindetterdi oryndaý úshin ony tıimdi paıdalaný qajet. Sondyqtan osy salany odan ári damyta berý kerek», dedi Prezıdent.
Osy rette ol jer qoınaýyn paıdalaný salasynda qordalanǵan problemalar az emesin aıtty.
«Geologııalyq barlaý jumystarynyń oıdaǵydaı júrgizilmeýi taý-ken ónerkásibin órkendetýge kedergi keltirip otyr. Mıneraldy shıkizat bazasyn tolyqtyrý qarqyny báseńdep barady. Onyń ústine qazir ıgerilip jatqan ken oryndarynyń qory sarqyla bastady. Qazba baılyqty tıimdi jáne únemdi paıdalaný qajet. Ol úshin zańnamany jaqsartyp, rásimderdi jeńildetý kerek. Geologııalyq barlaý jáne kenishterdi ıgerý isine ınvestısııa tartý aıryqsha mańyzdy. Úkimet pen Parlament osy salaǵa qatysty naqty sharalar ázirleýge tıis», dedi Memleket basshysy.
