«Parlament – zań shyǵarý bıligin júzege asyratyn eń joǵary ókildi organ. Úkimettiń quzyretine jatatyn máselelerdi ajyratý mańyzdy. Úkimettiń burynǵy múshesi retinde maǵan bul máseleler óte jaqsy tanys ári túsinikti. Bizdiń negizgi jumysymyz ózekti máselelerdi sheshý úshin zańnamalyq normalardy qabyldaýǵa, onyń júzege asyrylýyn baqylaýǵa baǵyttalǵan.
Medısına qyzmetkerleriniń mártebesin bekitý, onyń ishinde medısına qyzmetkerleriniń kásibı jaýapkershiligin saqtandyrý jáne medısına qyzmetkerlerin qorlaǵany úshin jaýapkershilikke tartýdy, elimizdiń medısına qyzmetkerleriniń quqyqtaryn qorǵaýdy, eńbegi men densaýlyǵyn qorǵaýdy qamtamasyz etetin zańdy jetildirý máselelerin qarastyrý qajet», dep jazdy Ashat Aımaǵambetov.
Sonymen qatar ol áıelder men balalardy qorǵaý boıynsha arnaıy normalar qabyldaıtyn ýaqyt jetkenin aıtty. Balalardyń terezeden qulaýynyń aldyn alý, olarǵa erekshe qamqorlyq kórsetý máselesi de ózekti ekenin atap ótti.
«Odan bólek, Bilim ınnovasııa lıseıleri, Abaı atyndaǵy, Sátbaev atyndaǵy mektepter sııaqty jelilik bilim ordalarynyń mártebesin bekitý, 10-11 synyp oqýshylaryna jumysshy biliktiligin alý úshin bilim berý grantynyń jańa túrin engizý boıynsha normalardy qabyldaý, bilim berý uıymdarynyń basshylaryna olardyń quzyretine kirmeıtin máseleler úshin ádiletsiz aıyppul salýdy toqtatý, pedagogıkalyq mamandyqqa túsý úshin shekti baldy bekitý boıynsha zańnamalyq normalar qajet», dep jazdy depýtat.
Sondaı-aq jazbada mektep, balabaqsha, emhana qurylysy qarastyrylmaǵan jerlerde jáne áleýmettik mańyzy bar nysandardyń ornyna boı kóteretin tyǵyz ornalasqan qurylystarǵa jol bermeý máselesi de bar.
Onyń aıtýynsha, memlekettik satyp alý týraly zań da erekshe nazar aýdarýǵa laıyq.
«Búginde atalǵan zań medısına, bilim berý jáne ǵylymı uıymdardyń basshylaryn tyǵyryqqa tirep otyr. Sybaılas jemqorlyq táýekelderi joıylǵan joq, bıýrokratııalyq rásimder men qyzmetterdiń, taýarlar men jumys sapasy syn kótermeıdi.
Ǵylym salasynda da kóptegen másele zańnamalyq sheshimdi qajet etedi. Ǵylymnyń damýyna jaǵdaı jasaý jáne ǵylymı eńbek nátıjelerin kommersııalandyrý úshin jańa zań daıyndaý mańyzdy.
Máslıhattyń eki shaqyrylymda depýtat bolǵan kezdegi, máslıhattyń áleýmettik máseleler jónindegi komıssııasynyń tóraǵasy, pedagog, óńirdegi memlekettik qyzmette jáne ortalyq memlekettik organdarda, Úkimet múshesi retinde jumys istegen kezde jınaǵan tájirıbem meniń aldaǵy qyzmetimde de kómektesedi dep úmittenemin.
Men óz qyzmetimde burynǵydaı ashyqtyq pen esep berý, ádildik prınsıpterin ustanamyn», dep jazdy Aımaǵambetov.
