Máselen, birtalaı mektep, balabaqsha, kolledj ǵımarattarynda arnaıy kúzet qyzmeti joq, týrnıket, dabyl núktesi tárizdi saqtaný qurylǵylary ornatylmaǵan. Al syrttaı beınebaqylaý júıesi bekitilgen talapqa saı emes. 159 bilim mekemesindegi beınebaqylaý qurylǵylary aýystyrýdy qajet etedi.
Taıaýda prokýratýra men qalalyq bilim bólimi oblys ortalyǵynda ornalasqan birneshe mektepke tekserý júrgizip, ondaǵy mamandandyrylǵan kúzet qyzmetiniń qyraǵylyǵyn synap kórgen. Nátıje kóńil kónshitpeıdi. Tekserý ótken 5 mektepte de kúzet qyzmetiniń salǵyrt jumys isteıtini anyqtaldy.
Qostanaı qalalyq prokýratýrasynyń aǵa prokýrory Elmıra Nurqanova ózi tekserip shyqqan mekteptiń birine sómkesine jalǵan granata salyp kirip ketkenin aıtty. Bilim ordasyna kelgen beısaýat jannyń sómkesinde ne jatqany eshkimdi qyzyqtyrmaǵan.
– Meniń áriptesim, tipti, «granatasyn» sómkege jasyrmaı-aq, qolyna ustap ótip ketti. Talap boıynsha, mektepke kelgen syrt adamdy kúzetshi metall izdeıtin qurylǵynyń kómegimen tekserip shyǵýǵa tıis. Eger qurylǵy belgi berse, kúzetshiniń álgi adamnyń, máselen, sómkesin tekserýge quqy bar. Alaıda munyń birin de istegen joq. Sonymen qatar syrtqa shyǵatyn evakýasııalyq joldardy tekserdik. M.Gorkıı atyndaǵy №19 gımnazııanyń evakýasııalyq esigi qulyptaýly bolyp shyqty. Pýlttik kúzet qyzmeti de óz mindetterin durys atqarmaıdy. Kelisimshart boıynsha qyzmet kórsetetin pýlttik kúzet shaqyrtý túsirgen nysanǵa 5-10 mınýttyń ishinde jetýge tıis. Al №14 mekteptiń pýlttik kúzet qyzmeti dabyl núktesi basylǵannan keıin, 27 mınýttan soń ǵana keldi, – deıdi aǵa prokýror.
Prokýratýra tekserý barysynda anyqtalǵan kemshilikterdi tizip kórsetip, qalalyq bilim bólimine eskertpe hat joldaǵan. Bilim bólimi ókilderiniń aıtýynsha, mektepterdegi mamandandyrylǵan kúzet qyzmeti taıaýda ǵana jumys isteı bastaǵan. Qazir kúzet qyzmetindegi kem-ketikterdiń ornyn toltyrý jumystary júrip jatyr. Mysaly, mektep kúzetshilerine jasyna qaraı shekteý qoıyldy. Budan bylaı jasy 50-den asqan azamattar bilim mekemelerin kúzetý jumysyna qabyldanbaıdy.
Al endi beınebaqylaý máselesine kelsek, oblystyq bilim basqarmasynyń esebinshe, eskirgen beınequrylǵylardy jańartýǵa 166 mln teńge qajet eken. Buǵan deıin osy maqsatqa bólingen 99,5 mln teńge 99 mektepti jańa qurylǵymen qamtamasyz etýge jetedi. Qalǵan nysandarǵa beınebaqylaý ornata qoıatyndaı qarjy bolmaǵandyqtan, basqarma oblys bıýdjetinen 66,3 mln teńge bólýdi surap otyr. Bul qarjy bólinse, óńirdegi balabaqshalar men mektep, kolledjderdiń beınekameralary tolyqtaı jańartylatyn bolady.
Qostanaı oblysy
