Jalpy otyrysty ashqan Ortalyq saılaý komıssııasynyń tóraǵasy Nurlan Ábdirov eń áýeli osy shaqyrylymdaǵy depýtattardy tanystyryp shyqty. Sodan keıin olardy birtindep minberge ant berýge shaqyrdy.
«Qazaqstan halqyna adal qyzmet etýge, Qazaqstan Respýblıkasynyń tutastyǵy men Táýelsizdigin nyǵaıtýǵa, onyń Konstıtýsııasy men zańdaryna qatań baǵynýǵa, depýtattyń ózime júktelgen mártebeli mindetterin adal atqarýǵa ant etemin», dedi depýtattar qolyn Konstıtýsııaǵa qoıyp turyp.
Sodan keıin depýtattar Palatanyń jańa tóraǵasyn saılaý úderisine kóshti. О́z sózinde Baqtyqoja Izmuhambetov Májilis tóraǵasyna Erlan Qoshanovtyń kandıdatýrasyn usyndy. Saılaý tikeleı jasyryn daýys berý arqyly ótti. Ony qadaǵalaý úshin depýtattar arasynan Sanaq komıssııasy quryldy. Nátıjesinde, daýys berý qorytyndysy boıynsha VIII saılanǵan Májilis spıkeri bolyp «Amanat» partııasynyń tóraǵasy Erlan Qoshanov saılandy.
Aıta keterligi, Konstıtýsııanyń 58-babynyń 1-tarmaǵyna sáıkes Májilis tóraǵasy memlekettik tildi erkin meńgergen depýtattar arasynan Palata depýtattary jalpy sanynyń kópshilik daýsymen jasyryn daýys berý arqyly saılanady.
Budan keıin sóz alǵan Májilis tóraǵasy E.Qoshanov senim bildirgen áriptesterine alǵys aıtty. Depýtattar jańa spıkerdi qyzmetke taǵaıyndalýymen quttyqtady.
«Búgingi kórsetken senimderińiz úshin zor alǵysymdy bildirgim keledi. Bul men úshin halqymyzdyń, sizderdiń aldaryńyzdaǵy úlken mártebe, zor jaýapkershilik. Sondyqtan ózderińizben birge saılaýshylardyń amanatyn, Memleket basshysynyń reformalaryn júzege asyrý úshin bar kúsh-jigerimdi, tájirıbemdi salatynyma ýáde beremin. Búgin Prezıdentimiz Qasym-Jomart Toqaev VIII saılanǵan Májilistiń alǵashqy sessııasyn ashyp, bizdiń baǵyt-baǵdarymyzdy anyqtap berdi. Ony sapaly ári jedel iske asyrý – bizdiń ortaq mindetimiz. Ol úshin barlyq múmkindik bar. Eń bastysy, halyqtyń senimin abyroımen atqaraıyq», dedi jańadan saılanǵan spıker E.Qoshanov.
Kelesi kezekte depýtattar palatanyń qos vıse-spıkerin saılady. E.Qoshanov áriptesterine Albert Raý men Danııa Espaevanyń kandıdatýrasyn usyndy. Daýys berý ashyq formatta ótti. Májilismender palata tóraǵasynyń usynysyn qoldady.
Kún tártibine shyǵarylǵan kelesi másele – Májilis komıtetterine qatysty edi. Májilis depýtaty Juldyz Súleımenova Májilis komıtetteriniń sany men ataýlaryn VII shaqyrylymdaǵy qalpymen qaldyrýdy usyndy. Daýys berýge qatysqan 97 depýtattyń 96-sy usynysty jaqtady. Budan keıin depýtattar komıtetter tóraǵalaryn saılady.
Áleýmettik-mádenı damý komıtetiniń tóraǵasyna – Ashat Aımaǵambetov, Zańnama jáne sot-quqyqtyq reforma komıtetiniń tóraǵasy bolyp Snejanna Imasheva, Qarjy jáne bıýdjet komıtetiniń tóraǵasyna – Mádı Takıev, Ekologııa máseleleri jáne tabıǵat paıdalaný komıtetiniń tóraǵasy bolyp Edil Jańbyrshın, Halyqaralyq ister, qorǵanys jáne qaýipsizdik komıtetiniń tóraǵalyǵyna – Aıgúl Quspan, Agrarlyq máseleler komıtetiniń tóraǵasy bolyp Serik Egizbaev, Ekonomıkalyq reforma jáne óńirlik damý komıtetiniń tóraǵalyǵyna Nurtaı Sabılıanov saılandy.
Depýtattar jalpy otyrysta Májilis Reglamentine engizilgen ózgerister men tolyqtyrýlardy qabyldady. О́zgerister Májiliske kirgen partııalardyń ókilettikterin keńeıtýge qatysty. Fraksııa qurý úshin qajetti depýtattar sanynyń eń az shegin alyp tastaý usynyldy.
Osylaısha, Májilistegi alty partııa da óz fraksııalaryn qurýǵa múmkindik aldy, olardy qatarynda «Amanat», «Respublica», «Aq jol», «Qazaqstan Halyq partııasy», «Aýyl» jáne Jalpyulttyq sosıal-demokratııalyq partııasy bar.
Eske sala keteıik, bul joly Májilis depýtattarynyń saılaýy jańa júıe boıynsha ótti. Kandıdattar partııalyq tizim boıynsha ǵana emes, bir mandatty okrýgter boıynsha da saılandy. Májilis quramyna alty partııadan 98 depýtat endi. Sonyń ishinde 29 depýtat bir mandatty okrýgterden saılandy.
