Prezıdent jańa Úkimetke tapsyrma berdi

«Úkimet pen Parlament ekonomıkany damytyp, halyqtyń ál-aýqatyn arttyrý úshin barlyq kúsh-jigerin jumyldyrýǵa tıis. Biz az ýaqyttyń ishinde aýqymdy saıası reforma júrgizdik. Túbegeıli ózgerister elimizdiń jańa dáýirge qadam basýyna jol ashty. Bul jumys jalǵasa beredi. Biraq ekonomıkalyq ózgerister saıası jańǵyrý úderisinen kenje qalmaýy kerek. Sondyqtan Úkimet áleýmettik-ekonomıkalyq reformalardy batyl júzege asyrýǵa tıis. Bul – óte jaýapty jumys», dedi Prezıdent.

Osy rette ol azamattar Úkimetke zor úmit artyp, joǵary talap qoıatynyn aıtyp ótti

«El senimin aqtaý – bárimizge syn. Men keshe Parlament sessııasynyń ashylýynda naqty mindetterge toqtaldym. Úkimet strategııalyq baǵdarymyzdy júzege asyra otyryp, birqatar máselege basa mán berýge tıis:

Birinshi. Turaqty ekonomıkalyq ósimniń jylyna kem degende 4 paıyz bolýyn qamtamasyz etý kerek. Sondyqtan ekonomıkanyń damý úlgisin túbegeıli ózgertýimiz kerek. Ol úshin ártaraptandyrý jumysyn júıeli júrgizip, naryq qaǵıdalaryn nyǵaıtý mańyzdy. Túpki maqsatymyz – joǵary tehnologııaǵa negizdelgen, ózin-ózi tolyq qamtamasyz etetin jáne básekege qabiletti ekonomıka qurý.

Ekinshi. Inflıasııany tejeý qajet. Bıyl ony keminde eki esege tómendetý kerek.

Eń aldymen, azyq-túliktiń baǵasyn retteý asa mańyzdy. Sol sebepti agroónerkásip keshenin jáne saýda-sattyqty damytý – negizgi basymdyqtyń biri. Ishki naryqty óz ónimderimizben barynsha qamtamasyz etý qajet. Sondaı-aq aýyl sharýashylyǵy ónimderiniń kólemin jáne onyń qosymsha qunyn arttyrý kerek

Úshinshi. Infraqurylymdy damytý qajet. Energetıka, sý jáne kólik qaýipsizdigin qamtamasyz etýge baǵyttalǵan keshendi sharalar qabyldanýǵa tıis. Energetıkalyq aktıvterdi jańǵyrtýǵa jaqyn arada jańa ınvestısııa tartý kerek. Bul jumysty «Tarıfti ınvestısııaǵa aıyrbastaý» baǵdarlamasy arqyly iske asyrýǵa bolady.

Qazir taýar gazynyń tapshylyǵy kúsheıip barady. Úkimet elimizdiń gaz óńdeý qýatyn arttyrý úshin jańa jobalardy júzege asyrýǵa tıis. Sonymen birge 25 sý qoımasyn salyp, sýdy barynsha únemdeý kerek.

Qazaqstan turaqty damý úshin Azııa men Eýropany jalǵaıtyn álemdik kólik habyna aınalýy qajet. Buǵan deıin qolǵa alynǵan kólik jáne logıstıka jobalaryn túgel ýaqtyly bitirý óte mańyzdy.

Tórtinshi. Aýmaqtyq saıasat jan-jaqty oılastyrylyp júrgizilýge tıis. Aımaqtar qýatty bolsa, búkil memleket ósip-órkendeıdi. Sondyqtan elimizdiń ákimshilik-aýmaqtyq qurylymy ońtaıly ári tıimdi bolýy kerek. Bul – óte mańyzdy másele.

Byltyr jańadan Abaı, Ulytaý jáne Jetisý oblystary qurylǵanyn bilesizder. Bul qadam osy aımaqtardy tyń qarqynmen damytýǵa jol ashty. Biz aımaqtar arasyndaǵy ekonomıkalyq teńsizdikti azaıtý úshin tıimdi sharalar qabyldaýymyz kerek. Osy rette Úkimet ákimdermen birlesip, árbir oblystyń áleýetin arttyrýǵa tıis.

Ár aımaqtyń ózine tán múmkindigin tolyq paıdalaný qajet. Men muny birneshe ret aıttym. Sondaı-aq aglomerasııalardy damytý máselesine basa nazar aýdarǵan jón. Úkimet osyǵan qatysty zańnyń múltiksiz oryndalýyn jáne josparlanǵan jumystyń tıimdi atqarylýyn qamtamasyz etýge tıis.

Besinshi. Adamı kapıtaldyń sapasyn dáıekti jáne júıeli túrde arttyrý qajet. «Jaıly mektep» jobasyn tıimdi iske asyrýdy qamtamasyz etý jáne JOO bazasynda akademııalyq artyqshylyq ortalyqtaryn qurýdy jalǵastyrý qajet.

Otandyq ǵylymnyń damýy meniń jeke baqylaýymda bolady. Sonymen qatar densaýlyq saqtaýdy sapaly jańa deńgeıge shyǵarý qajet. Ol úshin áleýmettik medısınalyq saqtandyrý júıesiniń tıimdiligin arttyrý kerek. Munda sıfrlyq sheshimderdiń kómegimen shyǵyndardy baqylaýdy kúsheıtý óte mańyzdy. Jalpy sıfrlandyrý ekonomıkanyń barlyq salalaryn qamtýy, azamattarymyzdyń ómiriniń barlyq salalaryna enýi tıis. Ol úshin aqparattyq tehnologııalar naryǵyn barynsha arttyrý qajet.

Altynshy. Memlekettik apparattyń jumysyn qaıta qarap, ony jańǵyrtý kerek. Áıtpese kózdegen maqsatymyzǵa jetý qıynǵa soǵady. Úkimet ákimshilik reformany jalǵastyryp, bıýrokratııany barynsha azaıtýy kerek. Memlekettik organdardyń tapsyrmany ýaqtyly ári sapaly oryndaý jetkiliksiz.

Ekonomıkanyń ósimin qamtamasyz etetin tyń bastamalar kóterip, jańa ıdeıalar usynyp otyrý qajet. Mınıstrler men ákimderdiń qyzmetin baǵalaǵan kezde olardyń osy baǵyttaǵy jumysy basty nazarda bolady.

Sondaı-aq qoǵamnyń memleketke degen senimin arttyrý – óte mańyzdy mindet. Bıliktiń ózgeris jasaýǵa yqylasty jáne daıyn ekenin jurt kórýi kerek. Bir sózben aıtqanda, shyn máninde «Halyq únine qulaq asatyn memleket» qalyptastyrý qajet. El basqarý jáne sheshim qabyldaý isine azamattardy barynsha tartqan jón», dedi Memleket basshysy.