Búgingi buqara aıqyn da naqty, salmaqty da shynaıy, barynsha saraptalǵan aqparatqa aıryqsha zárý. Ásirese, qazaq tildi aqparat keńistiginde saraptalyp-saralanǵan, suryptalyp-ekshelgen, shynaıylyqqa negizdelgen materıaldarǵa degen suranys artyp tur. Mine, osynaý qajettilikterdi eskerip, qalyptasqan olqy tustardyń ornyn toltyrmaq maqsatpen Ertistiń Pavlodar óńirinde AIQARA.KZ atalatyn aqparattyq portal iske qosylyp otyr.
Aqparattyq portaldyń ashylýyna Aqparat jáne qoǵamdyq damý vıse-mınıstri Danııar Qadyrov qatysyp, jergilikti qazaq tildi jýrnalısterdiń bastamasyna sáttilik tiledi.
Aıtyp óteıik, portaldyń quryltaıshysy – «Ertis Medıa» JShS. Seriktestiktiń dırektory Aıda Hamzına ana tilimizdegi jobanyń keleshegi zor ekenin, alda portaldy jetildirip, jan-jaqty damýyna qoldaý jasalatynyn tilge tıek etti. Aqparattyq saıt óńirlik bolǵanymen, tutas elimizdiń aqparattyq keńistigi úshin mańyzdy bolatyny anyq.
Al aýqymdy jobany júzege asyrýǵa Aqparat salasynyń úzdigi, Halyqaralyq «Qazaq tili qoǵamy» Pavlodar oblystyq fılıalynyń tóraǵasy, jańa portaldyń bas redaktory Asyl Ábish muryndyq boldy.
– Portal alańdarynda tutas qoǵamdy tolǵandyratyn máseleler, oıyńyzben oraılas, pikirińizben úndes, tanymyzǵa tatıtyn, talǵamyńyzǵa dóp keletin aqparat kórinis tabady dep otyrmyz. Aıpara álemge aıqara qaraýǵa shaqyratyn, kóz jetpes jerge sóz jetetinin basshylyqqa ala otyryp, málimetti meılinshe saraptap berýge kúsh salatyn jańa saıttyń tili de, úni de qazaqsha shyǵatynyn qaperge salmaqpyn. Tasqyny mezgil saıyn údeı túsken aqparattyń anyǵy men qanyǵyn, durysy men burysyn ekshep alý búgingi qoǵamǵa ońaı bolmaı otyrǵanyn moıyndaýymyz kerek. О́kinishke qaraı, áleýmettik jeli alańdary jelik qýǵan jel sózge, shyndyqqa janaspaıtyn, aqıqattan alshaq, jalǵan aqparǵa tolyp ketti. Aqparattyq keńistikte jurtshylyqty jańylystyratyn, aqıqattan adastyratyn, ony-muny máseleni jetkizý barysynda bir tarapqa ǵana bura tartatyn áreketter de etek alǵany ras, – deıdi Asyl Ábish.
Elektrondy keńistikke toptasqan jergilikti tájirıbeli jýrnalıster qazaq tilindegi aqparattardy ábden súzgiden ótkizip, saraptap, barynsha aıqara, ıaǵnı keń qulashty turǵyda, tereń tanymda alýǵa múmkindik jasaý mıssııasyn júzege asyrady. Portal túrli bólim-sanattardy toptastyryp, kúndelikti turǵyda jáne ár qıly baǵyttar men taqyryptarda maqalalardy, beıne-kontentterdi usynýdy kózdeıdi.
