Mamandardyń aıtýynsha, álemdik rekord ornatý úshin eń aldymen kýrort halyqaralyq standarttardyń barlyq talabyna saı keletin qalypta jumys isteýge tıis. Oǵan qosa shańǵy tebetin jol Halyqaralyq shańǵy federasııasynyń talabyna sáıkes kelýi kerek. Gınnestiń rekordtar kitabyna ený úshin eń joǵary núkte retinde 3 100 metr bıiktik belgilengen. Al Shymbulaq teńiz deńgeıinen 3 200 metr bıiktikte ornalasqan. Sondyqtan ol álemdegi eń bıik túngi shańǵy trassasy retinde Gınnes rekordyn ornatty. Buǵan deıin mundaı rekordtar eshqashan bolmaǵan. Qazaqstandaǵy taý-shańǵy kýrorty birinshi bolyp tirkeldi.
Aıtýly oqıǵa barysynda Guinness World Records keńsesiniń sýdıasy Sheıd Sýbası-Gemıdjı: «Qajetti qujattardyń barlyǵy tekserildi. Shańǵy bazasyna qatysty aqparatty túgeldeı qarap shyqtyq. Bıiktigi ólshendi. Geodezıster men arnaıy mamandar jumys istedi. Trassany ózimiz synap kórdik. Jaryqtandyrý, joldy tegisteý jaǵyna da oń baǵa beremin. Barlyǵy talapqa saı shyqty», dep málimdedi.
Sheıd Sýbashı-Gemıdjı saltanatty oqıǵa arqyly Shymbulaqtan tabylǵanyna bek qýanyshty ekenin aıta kele, taý shańǵysy kýrortynyń bas dırektory Rınat Ábdirahmanovqa álemdik rekordty rastaıtyn sertıfıkatty tabys etti. Sertıfıkatty tapsyrý rásimi men rekord nátıjesin resmı tirkeý – teńiz deńgeıinen 3 200 metr bıiktikte «Talǵar asýy» stansasynda ótti.
«Shymbulaq» taý kýrorty álemdegi eń bıik túngi shańǵy trassasy retinde resmı túrde Gınnes rekordyn alǵany týraly sizderge habarlaýǵa qýanyshtymyn. Bul álemdegi jańa rekord», dedi Sheıda Sýbashı-Gemıdjı.
Saltanatty sharaǵa Mádenıet jáne sport mınıstri Ashat Oralov pen Almaty qalasy ákiminiń orynbasary Arman Qyryqbaev qatysty.
«Búgin – tarıhı kún. Bizdiń «Shymbulaq» taý shańǵy kýrortymyz Gınnestiń rekordtar kitabyna endi. Bul – búkil el úshin úlken jetistik. Árıne, bizdiń áleýetimiz zor, Shymbulaq – elimizdegi týrızmdi damytýdyń negizgi oryndardyń biri. Jalpy, qazirgi tańda Mádenıet jáne sport mınıstrliginiń aralasýymen naqty qadamdar qabyldanyp jatyr. Atap aıtqanda, elimizde aldaǵy jeti jylǵa arnalǵan týrızm salasyn damytý tujyrymdamasy ázirlendi. Biz jergilikti atqarýshy organdarmen, seriktestermen, bıznes qoǵamdastyqpen birlesip ınfraqurylymdy jáne týrızmimizdi damytamyz», dedi Ashat Oralov.
О́z kezeginde mınıstr «Shymbulaq» kásipornynyń bas dırektory Rınat Ábdirahmanovqa álemdik rekordty rastaıtyn sertıfıkatty amanattady. Shara sońynda qyzyl lenta saltanatty túrde kesilip, eń bıik túngi taý shańǵysy trassasymen tómen qaraı jappaı syrǵanaý ótti.
Teńiz deńgeıinen 3 200 metr bıiktikte túnde shańǵymen syrǵanaý 2021 jyldyń qarashasynda bastalǵan edi. Osy ýaqyt ishinde júzdegen myń adam túngi ýaqytta eń joǵary núkteden túsip úlgerdi.
Taý shańǵysy kýrortynyń baspasóz qyzmetiniń habarlaýynsha, 2021-2022 jylǵy maýsymda túngi shańǵymen syrǵanaýǵa 50 346 týrıst kelgen, bıylǵy maýsymda 10% kóp keldi, ıaǵnı 55 486 kelýshiler boldy. Sonymen qatar 2021-2022 jylǵy maýsymda kúnine 12 520 adam kelse, bıylǵy maýsymda kýrortqa 1 mln-nan asa adam kelip úlgerdi.
«Bul degenimiz – ishki týrızm jáne syrtqy týrızmdi damytý maqsatyndaǵy jasap jatqan qadamdardyń biri jáne týrıstik maýsymǵa qaraıtyn bolsaq, naqty kórsetkish boıynsha tarıhta alǵash ret ishki jáne syrtqy týrızmdi qosqanda Shymbulaqqa 1 mln-nan asa týrıst keldi. Áleýetimiz zor. Bul jumysty biz mınıstrlik tarapynan ákimshilikpen birlesip, kásipkerlermen jáne bizdiń áriptestermen jalǵastyramyz», deıdi Mádenıet jáne sport mınıstri.
Shyndyǵynda, Shymbulaqtaǵy endi qaıtalanbaıtyn tarıhı sátke taý týrızmin jaqsy kóretin qala turǵyndary da ortaqtasty.
Qala turǵyndarynyń biri Gúlmıra Iýsýpova: «Talaı eldi sharlap kórdim. Biraq bizdiń Shymbulaqqa jeteri joq. Trassa keremet. Ony munda turaqty túrde keletin shańǵyshylardyń bári jaqsy biledi. Osyndaı mártebege ıe bolyp jatqanyna qýanyshtymyn», dedi.
Al Mádı Aldabergenov atty almatylyq: «Men 18 jyldan beri shańǵy tebemin. Kásipqoı shańǵyshymyn. Shymbulaq Gınnes rekordtar kitabyna enýge ábden laıyq. Rasynda, Shymbulaq – shańǵy tebýge taptyrmas jer. Gınnes rekordtar kitabyna engizilgennen keıin kelýshiler sany kóbeıe túsedi degen boljam bar», dedi.
ALMATY
