Endigi jerde EQDB Qazaqstandaǵy «jasyl» ınvestısııalardy qoldaý maqsatynda qarjylandyrýdyń jańa kózderin usynyp otyr. GEFF Kazakhstan II «jasyl» ekonomıkany qarjylandyrý jobasy aıasynda bólingen 150 mln AQSh dollary kásiporyndar men úı sharýashylyqtaryna kómek retinde baǵyttalmaq. «Jasyl» qarjylandyrýdyń atap ótýge tıisti tusy ol genderlik aspektilerdi de eskerýi tıis.
Al tehnıkalyq qoldaýdy Klımattyq ınvestısııalyq qorlary (Climate Investment Funds) kórsetedi.
Osy arqyly 2023 jyldyń basynda Parıj kelisimine tolyq qosylǵan Eýropa qaıta qurý jáne damý banki (EQDB) Qazaqstanǵa elektr energııasyn tutynýdy azaıtýǵa, jańǵyrmaly energııa kózderin paıdalanýdy ilgeriletýge jáne jergilikti kásipkerlerge ekologııalyq qaýipsiz tájirıbelerdi engizýde qoldaý kórsetýge kómektesedi.
EQDB iske qosyp jatqan jańa qarjylandyrý baǵdarlamasynyń arqasynda respýblıka boıynsha júzdegen kásiporyn men myńdaǵan úı sharýashylyǵy óndirisin jańǵyrtýǵa, energııa tıimdiligin arttyryp, ekologııalyq turaqtylyqty jaqsartýǵa múmkindik alady.
Bank búkil el boıynsha jeke tulǵalarǵa, jeke kompanııalar men ShOB-qa kredıt berý úshin Kazakhstan Green Economy Financing Facility II (GEFF Kazakhstan II) jobasyna qatysatyn qarjy ınstıtýttaryna 150 mln AQSh dollaryna deıingi mólsherde (teńgelik balamada) qarjylandyrýdy usynady.
Joba sonymen qatar joǵary sapaly «jasyl» taýarlar men jabdyqtardy jetkizýshiler men óndirýshilerge, onyń ishinde Green Technology Selector onlaın-kataloginde ornalastyrylǵan jáne GEFF Kazakhstan II jobasynyń veb-saıtynda qoljetimdi taýarlardy qarjylandyrýdy usynady.
Sonymen qatar Klımattyq ınvestısııalyq qorlardyń (Climate Investment Funds, CIF) qoldaýymen GEFF Kazakhstan II jobasy jergilikti «jasyl» tehnologııalar men jabdyqtar naryǵyn damytýǵa járdemdespek. Bul óz kezeginde «jasyl» ekonomıkanyń ósýine yqpal etip, «jasyl» tehnologııalardy neǵurlym qoljetimdi ete túsýge tıis. Oǵan qosa jańa jumys oryndaryn ashýǵa septesedi. Joba sondaı-aq klımattyń ózgerý táýekelderin azaıtý jáne olarǵa beıimdelý jónindegi jobalarǵa ınvestısııalardy yntalandyratyn, tuıyq sıkldi ekonomıkany ilgeriletetin jáne Qazaqstan ekonomıkasynyń dekarbonızasııasy men básekege qabilettiligin arttyrýǵa yqpal etetin bolady.
Joǵaryda atap ótkendeı, jańa joba EQDB-nyń genderlik SMART tásilin qamtıdy, ol múmkindikter teńdigi men Qazaqstan ekonomıkasyndaǵy áıelderdiń rólin arttyrýǵa jol ashady. Jobaǵa qatysatyn qarjy ınstıtýttary genderlik teńdikke negizdelgen jáne genderlik aspektilerdi eskere otyryp, qarjylyq qyzmetterdi usynatyn jańa ınvestısııalyq mádenıetti paıdalanady.
GEFF Kazakhstan II jobasy 2020 jyldan bastap Aýstrııa úkimeti men Jahandyq ekologııalyq qordyń qoldaýymen iske asyrylyp kele jatqan GEFF Kazakhstan qanatqaqty jobasyna negizdelgen. Joba iske asyryla bastalǵaly beri oǵan bir jarym myńnan astam qatysýshy tartylyp, eldegi energetıka jáne energııa tıimdiligi jónindegi jobalarǵa baǵyttalǵan qarjylandyrý kólemi 30 mln AQSh dollaryn quraǵan.
Joba sonymen qatar kómirqyshqyl gazynyń jyldyq shyǵaryndylaryn 200 myń tonnadan astamǵa azaıtýǵa jáne bastapqy energııany únemdeýge saǵatyna 573 myń megvattqa jetýge kómektesip otyr. Qarjylandyrý SentrKredıt Banki, Shinhan Bank jáne KMF mıkrokredıt uıymy arqyly júzege asyryldy. Qarjylandyrylǵan jobalardyń kóp bóligi (60%) áıelder basqaratyn bızneske qatysty jáne aýyldyq jerlerde ornalasqan.
ALMATY
