Ǵalymdardyń shyǵarmashylyq murasyn zertteýge arnalǵan sharaǵa jýrnalıstıka fakýltetiniń ǵalymdary Klara Qabylǵazına, Medeýbek Saǵatbek, Ǵalııa Ibraeva, Sáýle Barlybaeva, Ámirhan Moldabekov qatysyp, estelikterin aıtty.
«Temirbek Qojakeev, Marat Barmanqulov, Qaıyrjan Bekhojın sııaqty qazaq jýrnalıstıkasynyń korıfeılerinen dáris alyp, keıinnen áriptes bolǵanymdy ómir boıy maqtanysh etýden tanǵan emespin. О́ıtkeni adamgershiliktiń bıiginde, ǵylymnyń shyńynda tanylǵan qazaq azamattarynyń ómir joly ultymyzǵa ulaǵat. Ǵalymdar qurmetine arnalǵan baıqaý ýnıversıtette jylda ótip keledi. Baıqaý ǵalymdardyń shyǵarmashylyǵyn, eńbekterin tanyp, bilý úshin, jýrnalıstıkanyń ǵylymı tujyrymdamasy negizderin baǵamdaý úshin shákirtterge tıgizetin paıdasy mol», dep atap ótti jýrnalıstıka fakýlteti Baspasóz jáne elektrondy BAQ kafedrasynyń dosenti Klara Qabylǵazına.
«Ustazdy ulyqtaýdyń, urpaq sanasyna ulaǵatyn uıalatýdyń ozyq úlgisi jýrnalıstıka fakýltetinde úzdiksiz jalǵasyp keledi. Ulttyq jýrnalıstıkanyń maıtalmandaryn tárbıelegen Qaıyrjan Bekhojın, Temirbek Qojekeev, Marat Barmanqulov oqýlary arqyly shákirtterdiń kásibı mashyǵyn jetildirý, quzyrettiligin arttyrý shyn máninde ulaǵatty is. Talaı daryndylardyń tusaýyn kesken, bolashaǵyna jol ashqan bul oqýlardyń respýblıkalyq aýqymda ótip jatqany qýantady», dep atap ótti jıyn barysynda jýrnalıstıka fakýlteti Baspasóz jáne elektrondy BAQ kafedrasynyń dosenti Saǵatbek Medeýbek.
Jas ǵalymdardyń jýrnalıstıka oqýlary ǵylym men bilimge, ónege men tárbıege baýlýda yqpaldy da, tanymdyq sharaǵa aınalýda. Osy oraıda stýdentter men jas ǵalymdarǵa arnalǵan baıqaýdyń nátıjesi boıynsha jeńimpazdar dıplomdarmen marapattalyp, úzdik jumystarǵa bir rettik arnaıy shákirtaqy taǵaıyndaldy.
Jeńimpazdar qatarynan tabylǵan 1-kýrs stýdenti Aıgerim Esimhan ǵalym-ustaz Temirbek Qojakeevti zertteýdiń ózi úlken mártebe ekenin jetkizip, ustazdyń ádildigi men talapshyldyǵyna tánti bolǵanyn aıtady.
Ǵylym jolynda orasan zor eńbek sińirgen ustaz eńbegin zertteý ári qaraı da jalǵasyn taba beredi. Is-sharaǵa «Qazaqstan» ulttyq arnasynyń ardageri Jumash Kenebaı, AbaiTV arnasynyń bas prodıýseri Jańylhan Asylbekova, «Qazcontent» AQ Basqarma tóraǵasy Bekzat Júsip, «Samruk Kazyna Trust» Qory korporatıvtik departamentiniń basshysy Mıras Muqash qatysyp, jeńimpazdardy quttyqtady.
