Máselen, 2021 jyly olarǵa 24 AEK mólsherinde ǵana nemese 70 008 teńge tólense, bıyl olar aı saıyn 345 000 nemese 100 AEK mólsherinde materıaldyq qamsyzdandyrý alady.
Búgingi tańda Olımpıada, Paralımpıada jáne Sýrdlımpıada júldegerlerimen qatar, olımpıadalyq sport túrleri boıynsha álem chempıony ataǵyn jeńip alǵan sportshylar men olardyń jattyqtyrýshylaryna da 100AEK mólsherinde ómir boıyna aı saıynǵy tólem qarastyrylǵan.
Aıta ketý kerek, materıaldyq qamsyzdandyrý el aýmaǵynda dene shynyqtyrý jáne sport salasynda keminde jıyrma jyl eńbek ótili bar, Qazaqstan Respýblıkasynyń azamattyǵyn alǵan sportshylar men jattyqtyrýshylarǵa ómir boıy tólenedi.
«Aı saıynǵy materıaldyq qamsyzdandyrý sportta joǵary nátıjege ıe bolǵan sportshylar men olardyń jattyqtyrýshylary úshin úlken qoldaý. Sonymen qatar bul jasóspirimder men jastardy sportpen aınalysyp, chempıon atanýǵa yntalandyrady. Dúnıejúzilik jarystarda elimizdiń namysyn qorǵap, júlde alǵan otandastarymyzdy áleýmettik turǵyda qorǵap, qoldaý máselesi mınıstrliktiń jiti nazarynda», dedi Mádenıet jáne sport vıse-mınıstri Sársen Quranbek.
