Sýretti túsirgen Dmıtrıı Erofeev
Eshqandaı qarajatsyz turǵyn úıge qol jetkizgen turǵyndar quddy qasıetti aıda tilegi qabyl bolǵandaı máz-meıram. Taldyqorǵandyqtardyń rııasyz qýanyshy aspandy áldılep turǵandaı. Sý jańa úı arnaıy solar úshin salynǵan. Birden 60 otbasyna baspana kilti tabystaldy. Turǵyn úıli bolǵandardyń bári – áleýmettik osal toptaǵy jetisýlyqtar. Olardyń qatarynda 10 balanyń anasy, múmkindigi shekteýli bala tárbıeleýshi, jarymjan jandar bar. Bári shynaıy, eshqandaı pafos joq.
Qýanysh ıeleri eshkimge, eshteńege shyǵyndalmaıdy. Tek shyraıly shahardyń ortalyǵyndaǵy sý jańa baspanaǵa qonys aýdarady. Memleket basshysy elimizdegi bıznes ókilderin jıyp, eldikti, egemendikti birge asqaqtatýǵa birlese jumys isteýge, qaıyrymdylyq jasaýǵa, týǵan jerdi túletýge, el ekonomıkasyn órkendetýge birlese atsalysýdy usynǵan edi. Mine, sonyń jemisi Taldyqorǵanda jalǵasyn tapqandaı.
Jańadan paıdalanýǵa berilgen kópqabatty turǵyn úıdiń jalpy aýmaǵy – 4 702 sharshy metr. О́z ıelerin tapqan baspanany belgili atymtaı jomart Danııar Abýlǵazın saldyrǵan. Mundaı jańalyqty baspana kiltin tabystaý rásiminde Almaty oblysynyń burynǵy ákimi Qanat Bozymbaev baıan etti.
– Qasıetti Ramazan aıynda qýanyshty sáttiń kýási bolyp turmyz. Baspanaly bolý qandaı baqyt?! Taldyqorǵan qalasynda 15 myńnan asa turǵynnyń baspanaǵa muqtajdyǵy baryn oblys ákimi bolyp turǵanda biletinmin. Baspana tapshylyǵyn azaıtý úshin túrli joba, bastamalar jasaqtaldy. Sonyń biri de biregeıi – eldegi kásipkerlerdiń, myqty mesenattardyń kómegimen baspana salyp, áleýmettik osal toptardy úımen qamtý. Danııar Rústemulyna telefonmen habarlasyp, baspanaǵa muqtaj jandardyń kóptigin aıtqanmyn. Sodan qaıyrymdy azamat qamsyz qalmaı, osy baspananyń irgetasyn qalap, búginde sizderge syıǵa tartýda. Bul kópqabatty turǵyn úıden páter alǵandardyń shańyraǵy shattyqqa, qýanyshqa, baqytqa tolsyn, – dedi Q.Bozymbaev.
Artynsha sóz alǵan D.Abýlǵazın jergilikti ákimdikke, «Hareket» qaıyrymdylyq qoryna, onyń ishinde quryltaıshysy Madııar Serikbaevqa alǵysyn bildirip, qaıyrly iske Memleket basshysynyń sózi sebepker bolǵanyn da jasyrmady. Qaıyrymdylyq qoryna erekshe toqtalýynyń da jóni bar. Sebebi «harekettikter» úı ıelerin anyqtapty.
Munan soń uıymdastyrýshylar páter kiltterin saltanatty túrde ıelerine tabystady. Olardyń qatarynda Erlan Serikbaev ta bar. Sý jańa páterdiń ıesi ekinshi top múgedegi eken. Qansha jyldan beri úı kezeginde turǵan. Osy ýaqytqa deıin páter jaldap turyp kelgen ol kóz jasyna da erik berdi.
«Qasıetti aıda tilegim de, armanym da oryndaldy. Qaıyrly jandarǵa alǵaýsyz alǵys bildiremin. Shyny kerek, kókiregim saırap turǵanmen tolqynystan sóıleı de almaı turmyn. Bastysy, osyndaı rııasyz qýanysh árbir shańyraqta oryn alsyn», dedi E.Serikbaev.
Qaıyrly istiń ıeleri munymen toqtap qalmapty. Baspanaǵa qol jetkizgenderge basqa da tartý jasapty. Árbir páterge asúılik jıhaz ben ydys-aıaq, bir-bir muzdatqyshty syı etipti.
Is-shara barysynda el aǵalarynyń mundaı jomarttyǵyna razy bolǵan Aqmaral Donbaeva ystyq iltıpatyn bildirdi. 10 balanyń anasy qaıyrymdy jandardyń mundaı qamqorlyǵy búgin úshin emes, bolashaq úshin jasalǵan óristi tirlik ekenin sóz etti.
«Búgin ózim úshin emes, balalarym úshin qýanyp otyrmyn. Árbir bala ońtaıly ortada, jaıly jerde ómir súrýi kerek. Osy ýaqytqa deıin páter alý arman boldy. Qazir sol tileýimiz oryndalyp otyr. Balalarymnyń atynan, ózimniń atymnan el aǵalaryna rızalyǵymdy bildiremin. Sol kisilerdiń arqasynda bolashaqtyń 10 tulǵasy alańsyz bilim alyp, jaıly jerde turatyn boldy», dedi A. Donbaeva.
Is-shara sońynda páter ıeleri estelik sýretke túsip, Ramazan aıynda rııasyz rızashylyqpen tarqasty.
Jetisý oblysy
