Zardap shekken adamdardyń barlyǵy úıindi astynan shyǵaryldy. Bul jóninde óńir basshysy Nurlan Noǵaev málimdedi.
«17 sáýir kúni saǵat 5:04-te Jańaózen qalasynda eki kireberisti 12 páterli 2 qabatty turǵyn úıdiń 2-shi kireberistegi páterinde jarylys boldy. Boljam boıynsha gaz qospasy jarylyp, 150 sharshy metr aýmaqta kireberis qulaǵan, saldarynan 4 adam kóz jumdy», dedi Mańǵystaý oblysynyń ákimi.
10:45-tegi jaǵdaı boıynsha medısınalyq kómekke 13 adam júgingen, onyń ishinde 8 - bala. 6 adam aýrýhanaǵa jatqyzyldy, taǵy 7 adam úıine jiberildi. Jarylystan úsh páterge zaqym kelgen. Úı gazdan ajyratyldy. Qoqystar tazartylyp jatyr.
Bul rette, oblys ákimi Nurlan Noǵaev aýrýhanaǵa túsken turǵyndardyń jaǵdaılaryn bildi.
Qazir oqıǵa ornynda vedomstvoaralyq komıssııa jumys istep jatyr, jarylys faktisi boıynsha qylmystyq is qozǵaldy.
Aýrýhanaǵa jetkizilgen naýqastar travmatologııa bóliminde jatyr, al aýyr halde jatqandar jansaqtaý bóliminde jáne qarqyndy terapııa bóliminde em qabyldap jatyr, bir naýqas sanavıasııa qyzmeti arqyly oblystyq aýrýhanaǵa jetkizildi.
«Marqumdardyń otbasylaryna qaıǵyryp kóńil aıtamyn. Zardap shekkenderge jáne olardyń otbasylaryna jańa baspanamen qosa materıaldyq kómek kórsetiledi. Tótenshe jaǵdaılar qyzmetine kómek kórsetken eriktiler men qalanyń qamqor turǵyndaryna alǵys aıtamyn. Qazirgi ýaqytta úıindi astynan barlyq adamdar shyǵaryldy», dedi Nurlan Noǵaev.
